Noreg kan få nasjonalt ALS-senter

Stiftinga ALS Norge har i fleire år arbeidd for å få oppretta eit nasjonalt senter for sjukdommen ALS. No håpar dei draumen snart blir ein realitet.

– Eit nasjonalt ALS-senter har vore ein draum for oss sidan stiftinga blei starta i 2008, og vi merkar no at vi kjem nærmare ei løysing, seier dagleg leirar for stiftinga ALS-Norge, Mona Bahus i ei pressemelding.

Stiftinga fortel at dei no opplever god framgang i prosjektet, og at dei har vore i møte med helseminister Bent Høie for å diskutera ulike løysingsforslag.

ALS – Amyotrofisk lateral sklerose – er ein sjukdom som fører til muskelsvinn fordi nervecellene som sender signal frå hjernen til musklane, blir øydelagde. Ifylgje ALS Norge er det rundt 300–400 personar som har diagnosen her i landet. Kvart år blir det oppdaga eitt til to nye tilfelle pr. 100.000 innbyggjarar.

Stiftinga ALS Norge peikar på at behandlingsprosessen er krevjande og avansert og at ikkje alle som får diagnosen, får eit verdig behandlingstilbod der dei er.

– Eit ALS-senter vil løysa desse utfordringane og tilby plassar til alle pasientar med pårørande som ønskjer utvida behandling, heiter det i pressemeldinga.

Ifylgje stiftinga vil eit nasjonalt ALS-senter for sjuke og pårørande kunna tilby behandling og støtte på lik linje med tilbod ein finn andre stader i Norden.

– ALS-sjuke fortener eit fullverdig og godt behandlingstilbod når dei har fått denne grufulle diagnosen, seier Mona Bahus.

For å lykkast med prosjektet treng stiftinga kapital og hjelp frå det offentlege.

– Stiftinga er no i dialog med Gitreklinikken og søkjer etter investorar og donorar som vil støtta eit livsviktig senter som vil gjera livet lettare for menneske som har fått ein dødeleg diagnose, heiter det.