NAF: Slik pakkar du julebilen
– Bruk god tid på pakkinga av bilen før du køyrer på juleferie. Då kjem de vel fram, er bodskapen frå bilorganisasjonen NAF før juleutfarten.
Det er avgrensa med plass i bilen. Derfor er det viktig å berre pakke det viktigaste og ikkje ta med altfor mykje bagasje. Det er viktig å sikre bagasjen godt, fordi usikra last i bilen er ein fare for trafikktryggleiken, heiter det i ei pressemelding frå organisasjonen.
I dei fleste nyare bilar er det festepunkt for stropper i bagasjerommet.
Annonse
– Bruk desse, og gjer dei klar før du pakkar bilen. Fest dei i festepunkta i bagasjerommet før du legg inn bagasjen, seier kommunikasjonsrådgivar Nils Sødal i NAF.
Det er viktig å pakke den tyngste bagasjen nedst i bagasjerommet, og så langt fram mot seteryggen som mogleg. Pakk dei mindre tinga rundt dei store koffertane eller bagane og stroppe alt fast til slutt.
– Bruk litt ekstra tid på dette slik at de kjem vel fram til reisemålet. Hugs også å ikkje ha harde lause gjenstandar inne i bilen. Nettbrett og lause mobilar er ikkje bra. Skal dei brukast, må dei sikrast, legg Sødal til.
For mange barnefamiliar er skiboksen eit kjærkomme ekstra bagasjerom på juleferieturen. Men mange veit ikkje kor mykje taklast dei kan ha på bilen. Sødal ber folk å ha kontroll kor mange kilo bilen kan ha på taket, og det finn ein i instruksjonsboka eller i vognkortet.
Annonse
(©NPK)
