Misnøgde med politinamn

Namnet Kvam lensmannsdistrikt fall ikkje i god jord i kommunane Tysnes og Samnanger. Dei klaga difor på det varsla namnet, som gjekk fram av ei orientering om den nye inndelinga av lensmanns- og politidistrikt. I Tysnes vart saka endåtil teken opp i formannskapet, som vedtok å klaga på namneavgjerda.

– Tenesteeininga består i dag av kommunar og område som elles i offentleg forvalting ikkje er ein naturleg region. Ho består av fragmenterte delar av Bjørnafjorden, Hardanger og Sunnhordland. Det vil aldri bli naturleg at denne eininga skal ha namnet Kvam lensmannsdistrikt, skreiv Tysnes kommune i klagen.

– Namnet er misvisande, skreiv ordførar Knut Harald Frøland i Samnanger.

Kommunane føreslo namnet Kvam, Samnanger og Tysnes lensmannsdistrikt, alternativt Kvam, Samnanger, Fusa og Tysnes lensmannsdistrikt.

Enden på visa var at Politidirektoratet i juni, etter råd frå Vest politidistrikt, avgjorde at namnet vert Kvam, Samnanger og Tysnes lensmannsdistrikt frå 1. januar 2020. I dag er også Fusa med i namnet, så litt minkar namnet i det minste.