Milliardbåtar på fjordvitjing

Tysdag fekk Herand ein uvanleg gjest. Den 85 meter lange yachten «Bold» dukka opp på fjorden ankra opp utanfor bygda.

I juni vitja båten Oslo, ifylgje VG. Avisa skriv at båten mellom anna har helikopterdekk, utekino og diskogolv. Dessutan har han treningsrom og boblebad. Båten er verdsett til om lag éin milliard kroner, skriv VG.

Ifylgje utleigesida Fraser Yachts kan du tinga chartertur med båten. Båten kan ha 12 gjester. Han har åtte kabinar og mannskap på 20 personar. Prisen for éi veke byrjar på 875 000 euro. På Instagram skriv selskapet som eig båten, Silver Yachts, at båten kan ha 16 gjester og mannskap på 24.

Fartøyet har mellom anna passert Stord og køyrt under Nordhordlandsbrua. Ifylgje Instagram-profilen skal båten nordover.

Førre veke var også yachten «M/Y Savannah» på tur innover i fjorden. I 2024 vitja den 83,5 meter lange båten Tromsø. NRK skreiv om besøket. Då kosta det over 10,5 millionar kroner i veka å leiga båten, i tillegg til drivstoff, mat, drikke og hamneleige.

«Savannah» er bygd av Feadship i Nederland. Ifylgje Feadship er båten verdas fyrste hybride superyacht og den fyrste som har metallic lakk. 

Yachten kan ha 12 passasjerar og eit mannskap på 26 personar. Han har seks kabinar, deriblant éin VIP-suite. Toppfarten er 17 knop, ifylgje nettstaden YachtCharterFleet (YCF).

Kino, basseng, spa, heis, treningsrom, trampoline, dykkarutstyr, kajakk og vasskuter er noko av det båten har om bord. Båten har også ein salong som er delvis under vatn.

Båten låg ute til sals for 140 millionar euro i 2024, ifylgje NRK. Det er ikkje mogleg å leiga han for charterturar, ifylgje YCF.