Meteorologen varslar våte dagar i vente: – Heilt klart vêrtaparen
Det vert våte dagar for mange i Sør-Noreg framover, medan resten av landet slepp billigare unna. Betring er venta mot helga og til veka, ifølgje meteorologen.
– Det er heilt klart Vestlandet som er vêrtaparen dei neste dagane. Spesielt torsdag og fredag peikar seg ut som ganske våte dagar, seier statsmeteorolog Julie Solsvik Vågane til NTB.
Men austlendingane kan ikkje berre gle seg på naboane sin kostnad. Nokre av bygene vil også treffa Austlandet, spesielt i indre strøk, men det blir langt mindre dramatisk, ifølgje Vågane.
Annonse
– For Austlandet er det ingen dagar som ser spesielt våte ut. Det er berre litt spreidd av og på, så det er ikkje så mykje nedbør det er snakk om. I tillegg får ein periodar med sol og temperaturar opp mot 20 grader. At det blir behagelege temperaturar, gjeld for så vidt for heile Sør-Noreg.
Solbriller og paraply
Men det er ikkje berre dårlege nyhende for vestlendingane. Utover laurdagen og inn i søndagen blir det betre.
– Det ser ut til at det blir tørrare mot slutten av helga, seier Vågane.
Annonse
I Midt-Noreg er det også lurt å ha med både solbriller og paraply når ein er ute og fartar dei neste dagane. Spesielt fredagen peikar seg ut som ein våt dag i Møre og Romsdal og Trøndelag, ifølgje meteorologen.
Lenger nord i landet blir vêrsituasjonen meir blanda.
– Det er nok greitt å vera førebudd på nokre byger både torsdag, fredag, laurdag og søndag.
– Om ein ser etter ein periode med opphald, så er det laurdagen som ser best ut lengst nord i landet. Medan for Nordland så er det fredagen som ser best ut, seier Vågane.
Betring neste veke
Starten av neste veke kan gi grunn til optimisme, i alle fall for Sør-Noreg.
Annonse
– Det er litt håp om at det byggjer seg opp eit høgtrykk utover neste veke. Per no ligg det an til at det er meir tysdag og onsdag som gir betre vêr i Sør-Noreg, og at det kan halda seg inn mot neste helg, seier Vågane.
Nord-Noreg får dessverre ikkje den same betringa. Høgtrykket i sør dirigerer lågtrykka nordover.
– Der er det nok helst av og på med nedbøren. Per no ser det ut som det blir ein litt kjøligare periode i nord i starten av neste veke, og at ein kan sjå litt snø på dei høgaste toppane.
(©NTB)
