Meteorolog om påskevêret: – Alle får sjansen til å nyte nokre fine dagar

Påskevêret ligg an til å bli skiftande i det meste av landet, ifølgje meteorologane. Påskesola vil komme på besøk hos dei fleste.

– Alle får sjansen til å nyte nokre fine dagar, sjølv om det blir veldig skiftande, seier vakthavande meteorolog Unni Nilssen ved Meteorologisk institutt til NTB.

Sørlandet og Austlandet, der våren er i gang med fleire varme dagar i det siste, kan vente seg snøvêr skjærtorsdag. Og det vil antakeleg bli ganske mykje snø enkelte stader.

– Telemark og indre Østfold kan vente mest snø, med opp mot ti centimeter. Men det blir eit dryss over alt, fortel Nilsen, som poengterer at det er forbigåande.

Varmare i helga

Allereie dagen etter, langfredag, blir det truleg sol og på det meste opp mot 10 grader igjen – før det kan bli endå varmare i helga.

– Det kan kanskje komme opp mot 12–14 grader på dagen etter kvart i helga, konstaterer Nilssen.

Vestlandet og Trøndelag kan også vente gode temperaturar, omtrent som på Austlandet.

Det ligg truleg an til noko regn, men han kjem truleg ikkje før på måndag, 2. påskedag.

Vekslande i nord

Nord-Noreg får også noko vekslande vêr.

– Det blir litt tredelt. Først blir det fint eit par dagar. Så får dei ein periode med nedbør eit par dagar, før det blir fint igjen etterpå, seier Nilssen.

– Viss vi ser på Bodø til dømes, har dei nokre plussgrader i vente. Dei første par dagane er det venta opp mot 10 grader på dagtid. Vidare fram ser det ut som dei får nedbør. I Bodø, som jo er ein kystby, vil det komme som sludd. Lenger inn i landet er det snakk om snø, seier ho.

I Tromsø blir det kaldare, men også dei kan vente seg nokre plussgrader, truleg rundt 5–7 grader på skjærtorsdag.

(©NPK)