MDG fekk gjennomslag for fleire klimatiltak
Kvam går inn i Klimapartnere Vestland, gjer enøktiltak og etablerer ei tilskotsordning for solcelleanlegg.
Saka har vore drøfta før, utan at det har vore fleirtal for å slutta seg til partnarskapen som arbeidet for kutt i utsleppa og grøn forretningsutvikling.
Denne gongen lukkast MDG. Fleirtalskonstellasjonen tok partnaravgifta på 50.000 kroner med i sitt budsjettframlegg, og fekk dei to grøne røystene som takk. MDG trekte sitt eige framlegg.
Artikkelen held fram under annonsen.
Les også:
Even Øyri (Ap) viste til at Kvam herad har knapt med ressursar. Han meiner det difor er greitt å slutta seg til ein organisasjon med kompetanse og profesjonalitet som kan vera nyttig for kvemmingane.
— Tida er mogen, sa han.
I fjor vinter sa eit knapt fleirtal nei til å gå inn i partnarskapen. Fleirtalet ville den gongen vurdera saka igjen i samband med klimaplanen.
Kvam får komande år ei tilskotsordning for dei som ynskjer å etablera solcelleanlegg i næringslivet og landbruket. Éin million kroner er sette av. Søkjarane kan få inntil 15 prosent av kostnaden dekt, men maksimalt 50.000 kroner per anlegg.
Budsjettvedtaket inneber at løyvinga til energiøkonomiserande tiltak i kommunale bygg vert auka med to millionar kraftfondskroner. Investeringa håpar fleirtalet å spara 100.000 kroner på kvart år.
