Mållaget nøgd med språksatsing i statsbudsjettet

I fjor hadde Kulturdepartementet ei språksatsing på 9,3 millionar kroner. Sjølv i eit stramt budsjett i krisetid er denne satsinga vidareført i 2021, og i tillegg legg dei 11,5 millionar kroner friske kroner i potten.

– Abid Raja gjer eit viktig språkpolitisk løft i budsjettet, med fleire konkrete tiltak for å følgje opp språkmeldinga dei leverte tidlegare i år, seier Peder Lofnes Hauge, leiar i Noregs Mållag, i ei pressemelding.

– Det er utruleg viktig at kulturminister Abid Raja satsar vidare på språkpolitikk, og for nynorsken satsar han på konkrete tiltak. Å vidareføre støtte til nynorskroboten som Nynorsk pressekontor utviklar, kan få svært mykje å seie for nynorsk i pressa i åra framover, seier Lofnes Hauge.

I tillegg får Det Norske Samlaget og Nynorsk avissenter ekstra støtte, attåt Teater Vestland som arbeider med å få til eit Nynorskhus i Førde. Kulturdepartementet har også funne plass til ei løyving til Vinjesenteret i Vinje.

På sikt håpar òg Mållaget å sjå at Det Vestnorske Teateret får ei auka fast driftsstøtte i tråd med rolla teateret speler for utviklinga av nynorsk scenespråk.

Peder Lofnes Hauge er også nøgd med at Noregs Mållag får 200.000 kroner for å skape rom for formidling av nynorsk litteratur til barn og unge.

– Desse pengane skal bli nytta godt når Noregs Mållag og Norsk Målungdom reiser på nynorskstafett neste år, fortel Lofnes Hauge.

Mållaget er likevel skuffa over at regjeringa ikkje kjem med eit ekstra løft for nynorsken i grunnskulen. Særleg er dei uroa for at det ikkje ligg inne pengar til språkdelte ungdomsskular i budsjettet frå Kunnskapsdepartementet.