Lokale butikkar fryktar ein dårleg vinter

Høge straumprisar gjer det dyrt å vera på hytta. Fleire lokale butikkar fortel om nedgang i talet på kundar frå Kvamskogen.

Jahn Brattli Tolo er styreleiar i Norheimsund Næringslag og dagleg leiar i Fargerike Norheimsund. Han fortel at sjølv om dei ikkje har konkrete tal å slå i bordet med, fortel fleire medlemer at dei merkar at det har vore færre bergensarar i butikkane denne hausten.

– Kvamskogen betyr ein del for butikkane i Norheimsund. Kor mykje hyttefolket legg att i kroner og øre, er vanskeleg å seia, men hos oss hender det i periodar at nesten halvparten av kundane på laurdagane har bergensdialekt. Slik har det ikkje vore i haust, seier han.

Tolo er spent på korleis resten av hausten og vinteren vert.

– Folk vert påverka av alt som skjer rundt oss i verda. Det er galopperande prisar på mange varer. Det gjer at mange reduserer forbruket. Folk kjøper det dei treng og ikkje det dei har lyst på, seier han.

Ikkje berre kundane slit med høge straumrekningar.

– Høge straumprisar gjev store ekstrakostnader for butikkane. Me ser allereie i dag at mange slit med straumrekningane. På ein måte kan du seia at butikkane får det frå begge endar. Me får både mindre omsetning og høgare kostnader, seier han.

– Hausten er lågsesong

– Eg har ikkje noko konkret å slå i bordet med, men sit med ei kjensle av at det har vore litt færre hytteeigarar innom butikken i haust, fortel Arve Øyri, dagleg leiar i Mo Sport AS.

Han fortel at det ikkje var uvanleg lite aktivitet i haustferien.

– Men så er heller ikkje hausten den tida av året då det er mest hyttefolk hos oss. Om hyttefolka held seg heime i januar og februar, kjem me til å merka det mykje meir enn me gjer no. I vintermånadene er kundane frå Kvamskogen ei stor kundegruppe, seier han.

Øyri peikar òg på at det ikkje berre er straumprisen som påverkar kor mykje folk handlar i butikken.

– Høgare renter, matvareprisar og drivstoffprisar påverkar handelen like mykje som straumprisen. Denne kombinasjonen gjer meg litt uroleg for framtida, seier han.

– Vêret betyr mykje

Dagleg leiar i Kvamskogen Landhandleri, Hilde Iren Ulland, fortel om mindre handel i helgane enn vanleg denne hausten. Ho er usikker på om det berre skuldast straumprisen.

– Denne hausten har me hatt få helgsr med skikkeleg fint vêr, og vêret betyr mykje for aktiviteten på Kvamskogen. I haustferien var det mindre aktivitet enn i fjor, men det kan vera fordi nordmenn i år stod friare til å reisa til utlandet, seier ho.

Ulland fortel at straumprisen ofte er eit samtaletema i butikken.

– Inntrykket mitt er at mange planlegg å bruka hytta som før, medan andre snakkar om å stengja hytta ned for vinteren, eller i alle fall vera meir selektive med når dei reiser på Kvamskogen, fortel ho.

Ho er spent på korleis vinteren vert.

– Hausten er lågsesong på Kvamskogen. Når snøen kjem, tek aktiviteten seg vanlegvis opp. Det skal bli spanande å sjå korleis det vert i år, seier ho.

– Håpar det går seg til

Hytteturistane finn òg vegen til Øystese. Arne Digernes er dagleg leiar i MX Sport Øystese AS. Han fortel at det har vore færre bergensarar i butikken i haust.

– Ofte kan opp mot halvparten av kundane i helgane vera hyttefolk. Slik har det ikkje vore i haust. Eg har snakka med andre butikkeigarar i Øystese som fortel det same, fortel han.

Kjem det færre kundar frå Kvamskogen i lang tid, fryktar han konsekvensane.

– Mange butikkar driv med små marginar og har ikkje mykje å gå på. Eg håpar verkeleg kundane kjem snart attende, seier han.

Heilt svart ser han likevel ikkje på det.

– Personleg trur eg det vil gå seg til. I det siste har det vore mykje snakk i media om at alt er dyrt og at me må spara. Eg trur mange vert påverka av dette. Når folk får tenkt seg litt om og ser at alt ikkje er heilt svart likevel, håpar eg dei kjem attende, seier han.

Digernes avsluttar med å oppmoda kvemmingane om å handla lokalt.