Laks har rømt i Bergadalen

Tysdag ettermiddag oppdaga Lingalaks AS at det var laks i sjøen utanfor ei merd på oppdrettsanlegget i Bergadalen i Kvam.

Årsaka til at laksen kom seg ut av merden er ein skade på ei not, skriv Lingalaks i ei pressemelding. Oppdrettsverksemda sette umiddelbart i vert tiltak for å sikra at den resterande fisken i merden ikkje skulle rømma.

Det er no sett i verk gjenfangst av den rømde fisken i tråd med beredskapsplanane til verksemda og i samråd med myndigheitene, står det i pressemeldinga.

Alle oppdrettsanlegg i nærområdet, relevante myndigheiter og elveeigarlag i nærområdet har vorte varsla.

Lingalaks kan ikkje fastslå kor mange laks som har rømt på noverande tidspunkt, men det er venta å verta klart i løpet av dagen.

Fisken på lokaliteten har ei snittvekt på om lag 3,8 kilo. Den skal ikkje vera behandla med medikament og har ingen sjukdom, ifølgje Lingalaks.

Privatpersonar kan fiska etter laks med stong. Fangsten kan leverast til Lingalaks sin lokalitet i Bergadalen ved Gravdal, måndag, onsdag og fredag mellom klokka 12 og 15 så lenge gjenfangsten går føre seg.

Dersom ein leverer inn rømt fisk, får ein 200 kroner per fisk, skriv oppdrettsverksemda. I tillegg kan fiskaren behalda fisken mot at feittfinnen vert fjerna av Lingalaks sitt personell.

Lingalaks ønskjer at all fangst vert rapportert. Fangst som ikkje vert levert inn kan rapporterast på e-post eller telefon.

I pressemeldinga skriv Lingalaks at hendinga er svært beklageleg, og at verksemda vil gjera alt den kan for at konsekvensane av rømminga skal verta små som mogleg.