Kvinne henta ned frå Kvamskogen

Ei kvinne (52) trong helikopterhjelp etter å ha gått seg vill på Tveitakvitingen i går kveld.

Politiførstebetjent Andor Helgheim fortel at kvinna gjekk til Tveitakvitingen frå parkeringsplassen ved Kvamskogen landhandleri. På veg tilbake gjekk ho seg vill.

– Det var både vind og kaldt, og snøfokk gjorde det vanskeleg å sjå spora i snøen. Kvinna hadde ikkje all verda med klede på seg, seier Helgheim.

Både eit Sea King-helikopter og ein luftambulanse var i sving for å finna henne. På bakken leita lokale Røde kors-hjelpekorps både med snøskuter og til fots.

Helgheim fortel at turbulens gav utfordrande flygeforhold, medan snøfokk gjorde bakken vanskeleg å sjå for mannskapa i helikoptera.

Klokka 19.56 vart kvinna funnen. Ho var ikkje skadd på noko vis, men var kald og sliten. Ho vart frakta med helikopter til Røde kors-hytta og fekk tilsyn av helsepersonell.

Kvinna var ikkje frå Kvam.

Ifølgje yr.no var det bortimot tjue minusgrader og sterk vind frå aust i området. Fjelltoppen kvinna vitja, er 1.299 meter høg.

– Me støttar meteorologen som seier at det ikkje er tilrådeleg å leggja ut på lange, krevjande fjellturar utan at ein er særs godt budd. Med slik temperatur og vind vert den effektive temperaturen svært låg. Heldigvis gjekk det bra i går, seier Helgheim.