Kraftskatten vert uendra

Kraftskatteutvalet føreslo å senka den nedre grensa for grunnrenteskatt for små kraftverk. Slik vert det ikkje, skriv regjeringspartia i ei pressemelding.

Kraftskatteutvalet tilrådde tidlegare i haust å redusera den nedre grensa for grunnrenteskatt frå 10.000 kVA til 1.500 kVA.

– Forslaget har skapa mykje uvisse i småkraftsektoren. Sidan det er uaktuelt for oss å gjera endringa som kraftskatteutvalet føreslår, slår me det fast allereie i dag, seier stortingsrepresentant Terje Halleland (Frp).

Dei andre forslaga frå kraftskatteutvalet, vil ikkje regjeringa ta stilling til før høyringsfristen har gått ut.

– Me treng meir grøn energi i Noreg. Når me no stadfestar at småkraftverka skal behalda grensa på 10.000 KVA, håpar eg det bidreg til ytterlegare investeringar i småkraft, skriv Ketil Kjenseth (V), leiar av energi- og miljøkomiteen i Stortinget.

Utspelet frå regjeringspartia blir godt motteke av både Landssamanslutninga av vasskraftkommunar (LVK) og Utmarkskommunanes samanslutning (USS).

Både USS og LVK forventar at ein like tydeleg avviser forslaga kraftskatteutvalet har kome med når det gjeld stor vasskraft.

– Regjeringa si melding om at småkraftverka beheld dagens innslagspunkt for grunnrenteskatt, vil sikra at dei nær 350 konsesjonane som er gjevne på desse vilkåra, står seg, og prosessar for etablering og investering kan halda fram, skriv dei i ei pressemelding.

(NPK–NTB)