Køyrde av vegen i Tørvikbygd

Meldinga om hendinga på fylkesveg 576 i Kvam kom klokka 14.09, melde Vest politidistrikt i Politiloggen.

Berre føraren, ei kvinne i 20-åra, var i den eine bilen som var involvert. Vedkomande verka ifylgje politimeldinga å vera i sjokk etter ulukka, men framstod elles som uskadd.

Måndag opplyser politioverbetjent Jarle Sjo Myklebust ved Kvam politistasjon at bilen var på veg mot Norheimsund. Bilen kryssa vegen og stoppa naturleg i grøfta.

Kollisjonsputa var ikkje utløyst. Det var lite skadar på bilen, og det er ikkje mistanke om høg fart, ifylgje Myklebust. 

Annan trafikk kunne passera køyretøyet. 

Politiet og ambulansetenesta rykte ut. Kvinna fekk førarkortet kverrsett.

– Føraren blas 0,0 i alkometeret, men me mistenkjer køyring i påverka tilstand. Det vart teke blodprøve av kvinna. Me veit ikkje om mistanken stemmer før me får svaret på blodprøven, seier Myklebust.