Køyrde av vegen i Tokagjelet

Ein bil med éin person køyrde fredag føremiddag av vegen og trefte fjellveggen i Tokagjelet, vest for Snauhaugentunnelen, i Kvam. 

Ulukka hende i låg fart, opplyste Vest politidistrikt i Politiloggen klokka 09.58. Meldinga om hendinga kom nokre minutt før.

Hendinga påverka ikkje trafikkflyten på staden, ifylgje politiet, som rykte ut.

Klokka 10.45 melde politiet at føraren vart frakta med ambulanse til kontroll. Bilen var då henta av bilbergar. 

Ifylgje politioverbetjent Per Gunnar Thrane i Kvam, Samnanger og Tysnes politistasjonsdistrikt var det særs glatt i Tokagjelet då ulukka henda. Bilen var på veg mot Norheimsund då føraren mista kontrollen og kryssa motsett køyrefelt. Førebels er det ikkje oppretta sak etter hendinga.