Koronakrisa legg store delar av samfunnet brakk

Ei lang rekkje arrangement og aktivitetar vert avlyste som følgje av koronaviruset. Skular og barnehagar vert stengde.

Ikkje lenge etter at Kvam herad onsdag tilrådde å avlysa alle arrangement som ikkje er naudsynte, strøymde meldingane om avlysingar av stort og smått inn. Alt frå konsertar, fotballtreningar og basarar til skirenn, turar og bading utgår.

Situasjonen er stadig i endring ettersom virusspreinga har eskalert. I går kom endå meir dramatiske tiltak frå statleg hald: Skular og barnehagar i heile Noreg vert stengde frå og med torsdag klokka 18, i fyrste omgang til og med torsdsg 26. mars. Tilsette i helse og omsorg og samfunnskritiske funksjonar skal likevel få tilbod til borna. Helsepersonell får utreiseforbod.

Kultur- og idrettsarrangement vert forbodne, og til dømes treningssenter, frisørar og badeanlegg må stengja dørene. Kollektivtransporten held fram, men folk vert oppmoda om å ikkje nytta han. Daglegvarebutikkane vert haldne opne, og regjeringa oppmodar folk å ikkje hamstra mat.

– Det er viktig for meg å seia at det ikkje er nokon grunn til panikk. Dette er føre var-tiltak og ein del av ein dugnad, seier ordførar Torgeir Næss i Kvam i ei pressemelding.

– Dei fleste kan handtera viruset fint, men nokre sårbare grupper toler det dårlegare. Dette vert gjort for å hindra og avgrensa smitte, seier han.

Slutt på det meste

Enno er ingen registrert smitta i Kvam, men i går hadde åtte vorte testa lokalt av fastlegen og nokre få på Voss sjukehus. Det opplyser informasjonsrådgjevar Øyvind Strømmen i Kvam herad.

Over helga vil testing gå føre seg i eit eige mottak ved legevakt, fortel han. Berre dei som har gjort ein avtale via fastlegen eller vakthavande på legevakta, vert testa. Har ein mistanke om at ein kan vera smitta av koronaviruset, skal ein fyrst ta kontakt via telefon.

Kvam herad har stengt kinoen, idrettshallane, biblioteket og rådhuset. Dei planlagde politiske møta dei neste vekene er utsette på grunn av koronaviruset.

Kommunalt tilsette får ikkje delta på kurs og konferansar, og heller ikkje på møte og arrangement som ikkje er naudsynte for å oppretthalda lovpålagde og forsvarlege tenester. Tilsette med symptom på luftvegsinfeksjon og tilsette i risikogrupper vert oppmoda om å kontakta næraste leiar for å drøfta heimekontor. Tilsette skal freista halda ein avstand på minst éin meter til kollegaer.

Heradet ber om at det vert gjennomført ein risikoanalyse av alle arrangement med fleire enn 30 deltakarar, og å avlysa alle arrangement som ikkje er naudsynte. På arrangement som vert gjennomførte, må ein sikra god handhygiene og informera om smittefaren.

– Våre tiltak er strengare enn Folkehelseinstituttet har tilrådd, men dette kan verta ein alvorleg situasjon, seier ordførar Næss.

Han seier at heradet heller vil førebyggja enn å få kritikk i ettertid for tiltak som ikkje vart utførte.

Avviklar gudstenester

Kyrkja i Kvam avlyser ei rekkje arrangement, mellom anna konfirmantleiren neste helg, føremiddagstreff og trusopplæringsarrangement. Gudstenestene held fram etter det som var planen i går, men ein vil berre bruka annankvar benk og ha få personar på kvar benk.

Kyrkja vurderer at ein kan halda fellesrådsmøtet onsdag med vanlege aktsemdsreglar.

Dei som har planlagt barnedåp, kan avlysa fram til sundag. Kyrkja kjem til å sikra og skilja gjester i dåpar som vert avvikla.

Kyrkja førebur seg på ein meir dramatisk situasjon og arbeider med eit konsekvensdokument.

– Me må førebu oss mentalt og praktisk på unormalt mange gravferder, seier kyrkjeverje Hans Soldal.

Gravferder vil ikkje verta avlyste, men ein kan måtta avgrensa dei med tanke på tidspunkt og tilgang. I kommunar i Gudbrandsdalen, til dømes, får berre dei næraste delta.

I Jondal vert gudstenestene 22. og 29. mars avlyste, pluss salmekvelen 24. mars. Barnekor- og konfirmantundervisinga er innstilt til og med påske. Morgonbøna tysdagar utgår inntil vidare, og andaktsaktiviteten ved Vikevollen sjukeheim er innstilt.

– Hald dykk heime!

I Ullensvang kommune er bibliotek, symjebasseng, skianlegg og idrettsanlegg stengde. Innbyggjarane vert oppmoda om å ikkje samlast om ikkje det er heilt naudsynt, og om å halda seg heime. Folk utanbygds vert bedne om å ikkje nytta hytter i Ullensvang.

– Ullensvang kommune har ei befolkning der ein høgare del av innbyggjarane er i risikogruppene for å kunna utvikla alvorleg sjukdom ved korona-infeksjonar enn i kommunar flest. Innbyggjarane vert oppmoda om å tenkja på førebyggjande tiltak for å prøva å avgrensa epidemien, og dermed skjerma dei mest utsette gruppene i kommunen, skriv kommuneoverlege Steinar Jacobsen på heimesida.

Ullensvang har oppretta ei eiga telefonline for spørsmål om viruset. Nummeret er 941 34 126.