Julevêret: Regn i nord – sol i sør

– Det ligg eit høgtrykk over Sør-, Austlandet og Vestlandet, som gir lettskya eller skyfritt vêr, seier meteorolog Magnus Ovhed i Meteorologisk institutt til NTB.

Temperaturane har falle noko i delar av Austlandet dei siste dagane, men fråvær av nedbør gjer at det ikkje blir kvit jul hos alle. Mange stader er rim på bakken det næraste ein kjem.

Meteorologen seier at «vêrvinnaren» i jula blir indre delar av Austlandet.

– Der er det framleis snø, og det blir minusgrader og skyfritt vêr. Her kan det bli ei riktig fin jul, mellom anna i område som Lillehammer og Telemark, seier han.

Regn og vind i nord

I kystområda er det venta plussgrader. Oppover langs kysten mot Møre og Romsdal og Trøndelag er det venta ein del regn i løpet av julaftan. I til dømes Trondheim kan det bli opp mot 6 grader.

Lenger nord startar likevel ruskevêret for alvor. Lengst nord i Nordland og oppover Troms ligg det an til veldig mykje regn julaftan og 1. juledag. Meteorologane har sendt ut gult farevarsel om at det kan komme opp mot 70 millimeter regn i løpet av 24 timar enkelte stader.

– Me får sjå i løpet av morgondagen kor mykje det faktisk kan bli, og om varsla må oppjusterast. Temperaturane kan komme opp i seks–sju plussgrader, og det blir også ein god del vind. Det blir ikkje noko særleg julestemning, seier Ovhed.

Snø kan forsvinne

I områda i nord kvar det er venta mykje regn, blir den eksisterande snøen trua. I alle fall der det er lite snø frå før av, forklarer Ovhed.

– I Tromsø ligg det derimot såpass mykje snø, som er godt pakka, og den vil bli liggjande. Men det er mange stader der det kan forsvinne heilt.

Også lengst nord blir det mildvêr.

– På vidda i Aust-Finnmark blir det truleg mindre nedbør, men også der blir det plussgrader, og det kan bli ganske glatt. Det er sendt ut åtvaring om underkjølt regn i delar av Finnmark.

Kaldare i romjula

Det er venta ei endring i vêret i veka som kjem, og romjula kan by på vêromslag fleire stader.

– Det er etter kvart venta ein overgang til kaldare luft som trekkjer sørover frå Nord-Noreg. Det milde regnet kan då gå over til kraftige snøbyer, men det er framleis ganske stor uvisse knytt til kor langt sør dette vil nå, og korleis det vil påverke Sør-Noreg, seier Ovhed.

Det er framleis over ei veke til nyttårsaftan og dermed noko uklare prognosar, men eit lite anslag kan likevel Ovhed komme med:

– Når det gjeld nyttårsaftan, ser Sør-Noreg førebels best ut med tanke på klarvêr.

(©NPK)