Jondøling engasjerte seg i rasdebatt

Landsmøtet til Sp krev ein nasjonal rassikringsplan. Det går fram av ein resolusjon vedteken i helga.

I ordskiftet tok jondøling Lajla-Margrethe Lindskog-Lund ordet. Ho viste til at det har vore mange hendingar knytte til steinsprang, skred og ras i nye Ullensvang kommune det siste året. Det er ei stor psykisk last for innbyggjarane, påpeika ho.

Lindskog-Lund framheva at det er dårleg med omkøyringsvegar, slik at ventetida kan verta lang og ein ikkje får til dømes heimesjukepleie eller rask hjelp i akutte naudsituasjonar. Ho meiner det vil vera samfunnsøkonomisk lønsamt å førebyggja i form av rassikring enn å dekkja alle kostnadene ras og stengde vegar medfører.

Initiativet til ynsket om ein nasjonal plan kom frå Hordaland Sp. Resolusjonen går ut på at ein slik plan for 12 år skal lagast i samband med neste rullering av Nasjonal transportplan. Planen skal omfatta dei farlegaste punkta på riks- og fylkesvegar.