Inngår samarbeid for å sikra ordentleg reparasjon av kyrkjer
NHO Byggenæringa og Hovedorganisasjonen KA går saman om å sikra kompetanse og arbeidskraft til vedlikehald av alle kyrkjer i landet.
– Kyrkjebygga representerer særleg verdifulle bygningar som òg er av stor betyding for folk flest. Denne samarbeidsavtalen inngår også som eit viktig bidrag i det felles løftet mellom stat, kommune og folkekyrkje for bevaring av særleg kulturhistorisk viktige kyrkjebygg, seier administrerande direktør Marit Halvorsen Hougsnæs i Hovedorganisasjonen KA i ei pressemelding.
Alle kyrkjebygg er omfatta av den nye avtala som dei har inngått saman med NHO Byggenæringa. Målet er å sikra tilgang på kapasitet og kompetanse til restaurering og vedlikehald av alle kyrkjebygg, i tillegg til oppføring av nye.
Artikkelen held fram under annonsen.
Samarbeidspartnarane håpar òg små og mellomstore aktørar innan byggebransjen kan dra nytte i dei lokale marknadene sine.
– Det er viktig å sikra at kompetansen til dei flinke fagfolka våre blir i byggenæringa. Oppdrag med å setta kyrkjene i stand vil medverka til rekruttering til handverksfag og sikra lokale arbeidsplassar, seier administrerande direktør Nina Solli i NHO Byggenæringen.
(©NPK)
