Ingen pris til Tokagjelet

Fylkesveg 33 i vann tevlinga etter at nær ni tusen personar hadde røysta, melder Opplysningsrådet for vegtrafikken (OFV) i ei pressemelding.

Vegen i Kvam var mellom dei ti som vart plukka ut av ein jury til å vera med i finalen. Dei ti vart valde ut mellom 1 500 nominasjonar av kring 250 ulike fylkesvegar.

– Er ikkje der

Ordførar Torgeir Næss (Ap) er ikkje vonbroten over nederlaget til eigen veg.

– Bortsett frå at slike «kåringar» set eit velfortent fokus på forfallet på kvardagsvegane, så er det grunn til å ta dei med ei klype salt. Det viktigaste i desse kåringane er nok den lokale mobiliseringa meir enn ei objektiv totalvurdering av kvalitet på dekket, breidd, framkome, rasfare og -hendingar og vegfundament, skriv han i ein e-post til HF.

Han vil tru at dei fleste tenkjer på smale vegar med dårleg asfaltdekke som dårlege, og at røystinga vert påverka av det.

–  Tokagjelet er ikkje der. Nesten tvert om. Eg forventa ikkje nokon siger i denne kåringa, skriv Næss.

Han er, til liks med Ullensvang-ordførar Roald Aga Haug (Ap), forundra over at vegen mellom Austrepollen og Nordrepollen ikkje var med i finalen.

 – Eg trur knapt det finst vegar her til lands som hakar av på fleire elendekriterium.

Vinnaren går langs Mjøsa mellom Minnesund og Bjørgo, og kryssar grensa mellom Akershus og Innlandet. Medan vegen mellom Tokagjelet og Steinsdalen i hovudsak kan skryta av at kilometrane i Tokagjelet er skredutsette, er vinnaren ifylgje OVF smal, bratt og rasutsett, og vert nytta som omkøyringsrute når E6 er stengd.

Forventar endringar

– Engasjementet har vore enormt. Me kunne hatt 100 finalistar. Dette er eit tydeleg signal frå folk som køyrer på desse vegane kvar dag. Dei ser konsekvensane av gradvis aukande forfall og eit system som ikkje verkar, seier leiar for samfunnskontakt og mobilitet i OFV, Torill Eidsheim, i pressemeldinga.

Bakgrunnen for kåringa er ein rapport tinga av OFV som syner at fylkesvegane forfell, sjølv om fylkeskommunane brukar stadig meir pengar på dei. Rådet hevdar at investeringane i veg har vorte meir avhengige av særtilskot og politiske eingongsløysingar som i praksis premierer dei som lèt vegane forfalla.

OVF har forventingar til at regjeringa tek grep i statsbudsjettet, som kjem 15. oktober. Vona er ein ny inntektsmodell med faste og rettvise kriterium, ei styrk rentekompensasjonsordning og meir og målretta pengar til skredsikring.

Ifylgje rapporten frå Vista Analyse har fire av ti fylkesvegar dårleg standard. Manglande dekke og smale og slitne parti som reduserer framkome og tryggleik, er ein gjengangar. Statens vegvesen skal ha stipulert vedlikehaldsetterslepet til 100 milliardar kroner.

– Fylka står i ein umogeleg skvis. Pengane strekk ikkje til, og systemet gjer oppgåva verre. Men den utfordrande situasjonen kan løysast viss finansieringa vert endra på ein klok måte, seier Eidsheim i presseskrivet.