– Ikkje gå i solbrillefella denne påska!
Billege solbriller frå utanlandske nettbutikkar kan gi falsk tryggleik i påskesola, åtvarar Standard Noreg.
– Det er lett å late seg freiste av pris og utsjånad, men solbriller utan dokumentert UV-vern kan faktisk gjere meir skade enn nytte, seier administrerande direktør i Standard Noreg, Jacob Mehus, i ei pressemelding.
Når pupillane utvidar seg bak mørke glas utan UV-filter, slepper auget inn meir skadeleg stråling. Påskesola, kombinert med refleksjon frå snø, gjer belastinga ekstra høg.
Annonse
Det er ei kjensgjerning at nordmenn handlar for store summar på nett kvart år, og ein betydeleg del av dette skjer frå utanlandske nettbutikkar. Det gjer det vanskelegare å vite om det ein kjøper er trygt.
– Når du handlar frå utanlandske nettbutikkar, er det ikkje alltid gitt at produkta oppfyller krava vi tek for gitt i Noreg. Her skal solbriller vere CE-merkte, men det er ikkje alltid tilfelle når ein handlar på nett, seier direktøren.
Hans klare råd er å velje CE-merkte solbriller som sit godt og som skjermar for lys frå sidene.
– Standardar gjer det enklare for oss som forbrukarar å ta trygge val. Når du vel CE-merkte solbriller, betyr det at dei oppfyller grunnleggjande krav til at produktet faktisk vernar auga dine. Samstundes er det viktig å vere klar over at merkinga ikkje seier noko om kvalitet på sjølve brilla eller komfort, avsluttar Jacob Mehus.
Annonse
Standard Noreg utviklar og forvaltar standardar i Noreg og har både næringsliv, styresmakter, interesseorganisasjonar, forbrukarorganisasjonar, forskingsorganisasjonar og andre som medlemer.
(©NPK)
