I 189 kommunar kan du no få sletta studiegjeld

Ordninga omfattar dermed over halvparten av dei 357 kommunane i landet, skriv regjeringa i ei pressemelding.

Dette dreier seg om dei minst sentrale kommunane på nivå 5 og 6 i sentralitetsindeksen til Statistisk sentralbyrå (SSB).

Innbyggjarar i desse kommunane kan søkje om å få sletta 25.000 kroner av utdanningsgjelda per år.

* Det er inga tidsavgrensing på kor mange år du kan få sletta utdanningsgjeld.

* Gjeld frå utdanning og opplæring på alle nivå kan slettast, inkludert folkehøgskule, grunnskule, vidaregåande opplæring, høgare yrkesfagleg utdanning og høgare utdanning.

* Du må ha vore i jobb i minst eitt år før du søkjer om å slette gjelda.

* Du må ha budd i éin av kommunane i ordninga i minst eitt år før du søkjer.

Denne ordningar kjem i tillegg til den eksisterande ordninga for gjeldssletting i kommunane i innsatssona Finnmark og Nord-Troms. Dei som bur der, kan no få sletta 60.000 kroner per år.

Alle som blir omfatta av ordninga, kan frå og med i dag logge seg inn på Lånekassens nettsider og registrere søknaden sin.

Senterpartileiar Trygve Slagsvold Vedum er glad for at ordninga no er i gang.

– Det aller viktigaste vi kan gjere for å sikre nødvendig kompetanse over heile Noreg også i framtida, er å motivere fleire som har flytta frå heimplassen sin for å studere, til å flytte heim etter studiane. Og å motivere folk som har vakse opp i større byar, til å flytte til mindre kommunar, seier han.

Vedum viser til at over 60.000 personar vil omfattast av ordninga. Han oppmodar alle til å søkje.

– Jo fleire som nyttar seg av ordninga, jo betre er det, seier han.

Arbeidarpartiet foreslo i haust kutt i ordninga i forslaget sitt til statsbudsjett. Det førte til mykje bråk, og partiet snudde. Ordninga blir dermed innført slik ho opphavleg var planlagd, med sletting av 25.000 kroner per år.

Ullensvang i sone 5 og Eidfjord i sone 6 er mellom kommunane som er omfatta av ordninga.