Hurra for Helga!
Laurdag kunne Helga Karlsen feira eksakt 25 år som butikkmedarbeidar hjå Coop marked Tørvikbygd.
Den 25.08.1993 byrja ho som ekstrahjelp på Coop.
– Dei hadde ein tilsett som var mykje sjuk, så eg steppa inn og gjorde mykje av hennar jobb, seier Karlsen.
– Eg visste jo godt om datoen sjølv, men trudde ikkje så mange andre visste om den, seier Karlsen.
Klokka 12 vart ho overraska med blomar, bollar, saft, kaffi og ei stor marsipankake.
– Det var veldig uventa, men kjekt. Det var ikkje slik eg hadde tenkt det skulle vera, seier Karlsen.
Set pris på arbeidet
– Gjennom 25 år har det vore ein grei arbeidsplass, nært heime. Eg har likt meg. Ein del utskiftingar har det vore i personalet, og sjølv om det kanskje er greiare med ein litt meir stabil gjeng, har eg også fått blitt kjend med mange nye folk, seier Karlsen.
– Eg har vore heldig som har hatt moglegheita til å gå på jobb. Eg har stundom tenkt litt på at ho eg tok over for, måtte sitja heime og vera sjuk, seier Karlsen, som har for vane å sykla til arbeid.
Etter feiringa fekk Helga gå heim og ta ei tidlegare helg.
Artikkelen held fram under annonsen.
Kontinuitetsberaren Helga
Dei siste åra er det meir enn mjølkeprisen, ein kartong heilmjølk kosta forresten om lag ni kroner i 1993, som har endra seg på Coop i Tørvikbygd. Helga har skapt kontinuitet og tryggleik i butikken for kundar og tilsette.
– I dagens samfunn er det vorte særs vanleg å byta både yrke og arbeidsplass ofte, og tendensen er at det skjer stadig oftare. Difor tykkjer eg det er viktig å visa at ein set pris på dei som vel å leggja ned mykje tid og store delar av sitt vaksne liv, slik Helga har gjort dei siste 25 åra, seier butikksjef Laila Berge Skogesal.
Overraskingsfesten hadde dei tilsette på Coop marked Tørvikbygd planlagt i om lag to veker.
– Helga er ei fantastisk dame, som alltid gjer sitt beste for å gje kundane god sørvis og hjelp når dei handlar. Ho er alltid blid og hyggjeleg, og sjølv om ho kanskje kan vera litt stille og beskjeden, har ho eit hjarte av gull. Ho vil det beste for dei rundt seg, som regel utan motkrav. Eg kjenner meg heldig som får arbeida med og læra å kjenna Helga. For meg som nytilsett butikksjef har ho vore ein ressurs for å læra korleis den daglege drifta av butikken er, seier Skogesal.
Sjur Mikal Dolveredaksjon@hf.no
