Hjortebestanden aukar: – Har gått frå rekord til rekord

Hjortebestanden aukar og trugar livsgrunnlaget til bønder på Vestlandet. Forskar meiner bestanden må kuttast i før han kjem ut av kontroll.

– I fjor blei det felt over 50.000 hjort i landet. Det har gått frå rekord til rekord, seier seniorforskar for naturforsking i NINA (Norsk institutt for naturforsking), Vebjørn Veiberg til NRK Møre og Romsdal. Han stadfestar at hjortebestanden i enkelte kommunar er altfor høg.

Når det blir så mange dyr, blir det ikkje nok mat til alle. Dette fører til at hjorten krympar i storleik og har større sjanse for å bli sjuk. I tillegg kan dyra òg koma i konflikt med landbruket og skogbruket.

– Det er viktig å ta ut dyra så ikkje bestanden aukar over støvelskafta.

72 kommunar i landet har kvotefri hjortejakt på kalv. Dei fleste av dei ligg i Møre og Romsdal, Vestland og Rogaland. Bonde og andre nestleiar i Bondelaget, Bodhild Fjelltveit, meiner det er eit steg i riktig retning.

– Men kvotane på vaksne dyr må òg aukast. Dette trugar livsgrunnlaget både for bønder og hjorten sjølv. Hjorteplaga kan vera det som gjer at marginane blir for småe for mange vestlandsgardar, seier ho til NRK Vestland.

(©NPK)