HF vann marknadspris

Hordaland Folkeblad si marknadsavdeling vann fredag kveld marknadsprisen til Landslaget for lokalaviser.

Grafikar Kristina Sofie Kvåle og dagleg leiar Camilla Skaar Ljones tok imot utmerkinga i Oslo fredag kveld.

— Det var veldig kjekt å vinna pris, seier Ljones.

Ho fortel at marknadsavdelinga har jobba målretta med marknadsstrategiar og annonsesal på fleire plattformer i året som har gått, og ho synest det er stas at nokon legg merke til det arbeidet ein har lagt ned. Det er fyrste gong HF vinn ein slik pris.

Ljones veit ikkje om prisen vil ha nokon innverknad på avisa i framtida.

— Det er nok mest kjekt for oss, seier ho

— Vore ein draum

Grafikar Kvåle seier at det er stort å vinna pris. Heilt sidan ho starta i HF, har ho hatt ein draum om å vinna marknadsprisen. Kvåle meiner at mykje av nøkkelen til suksess ligg i at ein har jobba meir som eit reklamebyrå og ikkje som ei tradisjonell lokalavis. Gjennom eigne kampanjar og konsept har ein klart å promotera lokal handel på ein inspirerande måte.

— Det er ein heilt ny måte for oss å driva marknadsføring på, seier ho

Kvåle legg ikkje skjul på at det har gått med mykje tid for å få eit bra sluttprodukt. Ho synest prisen er eit prov på at hardt og målretta arbeid lønar seg. Heideren har gjeve ny motivasjon for å jobba hardare.

— Eg ynskjer å vinna meir, seier Kvåle, som for tida er på ferie og ergrar seg over å ikkje få ta til med nye prosjekt med ein gong.

HF fekk prisen i lag med Bømlo-nytt, ettersom det ikkje vart delt ut prisar i fjor som fylgje av pandemien.

«Strategiske og kreative»

HF fekk utmerkinga for satsinga på lokal handel. Grunngjevinga til juryen lyder slik:

«Hordaland Folkeblad er ei tradisjonsrik lokalavis, med nøkterne ressursar og medarbeidarar, som til liks med alle andre lokalaviser må jobbe hardt for å få til noko. Juryen er imponert over alle marknadstiltaka Hordaland Folkeblad har bidratt med i lokalsamfunnet det siste og særs krevjande året. Mellom anna har lokalavisa dratt i gang spennande handle lokalt-aktivitetar og vore nyttig rådgjevar for lokale bedrifter. Avisa har jobba tett med næringslivet og organisasjonar og bidratt svært godt med idéskaping, rådgjeving og praktisk marknadsføring på ulike plattformer. At Hordaland Folkeblad både er strategiske og kreative, og bruker nye og gamle mediekanalar for å bidra til lokal handel, gjer at juryen med stor glede tildeler Hordaland Folkeblad LLAs marknadspris.»

HF stod i tillegg bak to av dei ti bidraga i finalen i klassen årets lokalavisside, som er ei tevling for redaksjonane i avisene. Her vart oddaavisa Hardanger Folkeblad tildelt vinnarprisen for ei framside der «babyen» Ullensvang kommune var illustrert med ein body.

I klassen årets lokalavisfoto var fire av tjue bidrag i finalen tekne av HF. Her vann Hallingdølen og Hordaland pris.