Heim att til larm

Trommeslagaren frå Øystese spela med bandet Giddygang på Bygdalarm i helga.

Vestrheim vart tidleg interessert i musikk. Han valde å søkja seg til Kongshaug Musikkgymnas på Lepsøy i Os, og flytta dit for 12 år sidan.

På Kongshaug møtte han Sarah, som syng i Giddygang. Tonen vart god mellom dei to, som er gift i dag.

Paret flytta til Oslo etter vidaregåande. Vestrheim byrja på NLA Høgskolen Staffeldtsgate. Han gjorde ferdig ein bachelorgrad i utøvande rytmisk musikk. På høgskulen trefte paret fleire av dei som i dag er med i Giddygang.

Røynd trommeslagar

Heile vegen har Sigmund spela trommer. Han fortel at han freista saksofon nokre år i Øystese Skulemusikklag, men no er det veldig lenge sidan han har spela det instrumentet.

Giddygang spela på Bygdalarm laurdag. Det er ikkje fyrste gong Vestrheim opptrer på festivalen. Han spela trommer for Boy Pablo, som han kjenner frå Kongshaug Musikkgymnas, i Øystese i 2019. Saman har dei vore på turné verda rundt.

Går i arv

Ikkje berre har Sigmund spela på Bygdalarm tidlegare. Far hans, Alvin Vestrheim, var med på å starta festivalen i lag med Arne-Kristian Teigland og fleire andre, fortel Sigmund. 

– Eg har vore med og hjelpt til sidan eg var barn. Det har vore ein stor del av sumrane gjennom oppveksten, seier trommeslagaren til HF.

Les ogso:

–Det er moro med ein festival der det finst éin person som kjenner alle

Alvin er ein av dei opphavlege medlemene som framleis er med. Han spelar bass og er framleis teknisk ansvarleg for festivalen, seier Sigmund. 

– Bygdalarm er noko far min har bruka mykje tid på, seier Vestrheim.

– Korleis er det å vera heime att på Bygdalarm i år?

– Berre veldig kjekt. Eg er van med å vera på scena. Kjekt å få gjera det heime. Kult at det er ein arena for musikken heime òg, svarar trommeslagaren.

Lever av musikken

Sigmund lever av jobben som musikar. Han driv eit studio i Oslo kalla GiddyHQ. Det held til i Urban Sound Studios i Oslo. Her ligg fem ulike studio under same tak.

– Det har vore draumen å leva av musikken. Veldig kjekt at eg kan leva av noko eg tykkjer det er kjekt å halda på med. Det er ein heldig situasjon, forklarar Vestrheim.

Trommeslagaren er so godt van at han ikkje har nervar før konserten, men gleder seg heller, fortel han.

– Eg likar bygdeestetikken på Bygdalarm veldig godt. Det er ein særeigen stil opp mot alle dei andre festivalane eg har vore på, fortel kvemmingen. 

Alle banda får eiga campingvogn. Det er den einaste festivalen ein har ein backstage med 1970-talspreg som liknar stova til oldemor, og i tillegg får eit heilt fenalår, utdjupar Vestrheim.

– Sjukt bra at det er ein slik festival i bygda. Kjekt å sjå at folk hjelper til og gjer dette på dugnad. Det er stas, seier kvemmingen.

Inspirerte av legendene

Sigmund skildrar musikken til Giddygang som ein stad mellom hiphop, soul og funk. Gruppa er inspirert av The Roots, seier han. 

Det er rap med band og vokal. Musikarane ser ofte bakover når dei søkjer inspirasjon.

– Me ser til dei gamle soul og funk-legendene som James Brown og Curtis Mayfield, fortel kvemmingen.

Bygdalarm skildrar Giddygang som ein gjeng som glid mellom R&B, soul, jazz og hiphop med ein svingande rytmisk flyt som er so mjuk og snerten at ein får lyst til å lena seg attover og berre flyta.

Gruppa syng og rappar på engelsk. Sarah syng og Vuyo rappar til vanleg. Sistnemnde kunne ikkje vera med denne kvelden. I staden stod Halvor Thormodsæter på scena, under namnet Trivino.

Tekstane våre er kanskje meir undrande om eksistensielle spørsmål. Korleis ein kjem seg gjennom ting. Dei fyrste platene var meir politiske, fortel kvemmingen.

– Me freistar å ha ein positiv vri på tekstane for å få folk til å smila og dansa i lag på konsertane. Målet vårt er at folk skal digga musikken, kosa seg og kjenna seg glade, seier Vestrheim.