Christoffer Soltvedt hadde heliumfylte ballongar på hovudet. Kva som skjer når dei sprekk, veit han ikkje.

– Sjela til sommaren

Med lukkeballongar på hovudet var Christoffer Soltvedt klar for det han meiner er årets kjekkaste festival.

Charlotte Svendsen Journalist
Publisert Sist oppdatert

Bygdalarm er sjela til sommaren i Norheimsund, seier han. Etter å ha køyrt drosje i mange år, var han glad for å ha fri i festivalhelga og kunna nyta stemninga fredag.

– Festivalen knyter bygda i lag på mange måtar, på same måte som heimkomefesten. Det er god musikk, gode vibbar og kjekke opplevingar, seier Soltvedt.

Espen Tyssebotn stemmer i. At mange som har flytta vekk og bur andre stader, i tillegg til mange tilreisande, deltek på festivalen, likar han godt. Han meiner storleiken på festivalområdet er viktig.

– Når det vert for stort, er det for mykje å sjå på og for langt å gå til dømes for å få mat, seier han.

God plass

Å reisa heim for å gå på Bygdalarm er tradisjon for Sol Marie Wallevik frå Ålvik. Ho hadde med kjærasten Peder Andreas Asheim for fyrste gong.

For Sol Marie Wallevik er Bygdalarm eit fint høve til å treffa gamle kjende. Kjærasten Peder Andreas Asheim debuterte som Bygdalarm-gjest.

– Det er artig at me må gå på dette for at du skal møta att folka dine, seier han til Wallevik.

Medan ho såg mest fram til å høyra Honningbarna, venta han mest på Side Brok. 

– Eg likar stemninga her. På andre konsertar er det knuffing og dytting. Her er det god plass, seier Wallevik.

Folk trekte mot scenen då Delara byrja syngja.

– Området var litt mindre enn eg hadde trudd. Men det er moro med ein festival der det finst éin person som kjenner alle som er her. Det finn ein ikkje andre stader, seier Asheim.

Kom på scenen

Klokka 20.30 gjekk Delara på scenen. Dei ivrigaste stod klare ved gjerdet. Ida Djupevåg fekk ei oppleving ho truleg aldri kjem til å gløyma. Delara ville ha ein frå publikum på scenen. Ho stod ved gjerdet og ropte «Gunerius», ein av songane til artisten.

Tommy Johnsen hjelpte Ida Djupevik over gjerdet då ho skulle på scenen med Delara. Etter uttrykket å døma gledde ho seg.

Dagen etter seier Djupevåg at det var stas. Ho vart rørt og grein på scenen. Dagen før hadde ho vore på Karpe World i Oslo. Der song Delara songen «Gunerius». Djupevåg la ut video frå konserten på Instagram-historia si, og spøkte om at ho er med Delara på turné. Delara hadde likt innlegget.

Det enda med eit fall då Ida Djupevåg kom på scenen. Delara rekte ut ei hand og tok imot henne.

Djupevåg hadde på seg ei Bygdalarm-fotballdrakt, og meiner det kan ha bidrege til at ho vart teken opp på scenen. Den grøne fargen skil seg ut i mengda, meiner ho. Eigentleg har Djupevåg sceneskrekk. Då ho skulle opp på scenen, tryna ho.

– Eg tenkte ikkje så mykje på det då, men eg har litt vond i kneet i dag, seier ho.

Delara song Gunerius då Ida Djupevåg var på scenen. Det heile vart fanga på film.

Etterpå fekk ho mykje merksemd. Mange hadde sett henne på scenen. Djupevåg fekk høyra at salet av fotballdrakter steig etter at ho var på scenen.

Då ho skulle gå heim etter festivalen, var det mange bilar som stoppa og lurte på om ho ville sitja på. På ein augneblink hadde ho blitt festivalkjendis.

Sjå fleire bilete frå den fyrste festivalkvelden her:

Delara måtte avlysa besøket på Bygdalarm i fjor. I år stod ho på scenen.
Til og med neglene matcha antrekket til denne tilskodaren som foreviga Delara.
Richard Kleven (t.v.), Tommy Johnsen og Svein Bratten sjekka vesker og billettar i inngangen.
Thea Melum-Hansen (t.v.) og Renate Østborg bur i ein båt i Norheimsund i festivalhelga. Det er ei god løysing, meiner dei.
Kristi Neteland frå Raudekrossen var på plass.
Ina Gauden Lid, Brynjolf Lid og Ingmar Lid (t.h.) hadde slektstreff på Bygdalarm.
Solveig Kaale Midthus (t.v.) stilte i «Bygdalarm-outfit». Her er ho med Magnus Berg og Malin Neteland.
Har fotballfeberen nådd heilt til Bygdalarm? Ingmar Lid kunne røpa at han nyleg hadde kjøpt skjorta, som var ein rest etter festivalen i fjor.
Espen Tyssebotn (t.v.) og Christoffer Soltvedt meiner at stemninga er det beste med festivalen i Norheimsund.
Nokre har meir lyst til å verta fotograferte enn andre. Vebjørn Grinde Gravdal poserte frivillig for fotografen. Også Selma Skjelnes Tveit ville vera med.
Sokkar og solkapsar var mest populære i butikken. Frå venstre: Anne Karin Djupevåg, Ingvild Rykkje og Celina Vangen.
Då Delara gjekk på scenenm vart både lyseffektar, fyrverkeri og pyro nytta.
Håvard Aalvik Stranden prøver å sikra seg betre plass ved å hoppa opp på ryggen til Isak Børve.
Frå venstre: Lilly Alida Eikrem, Eline Torvund, Liva Garen og Guro Honningsvåg Vik stod heilt framme ved gjerdet og venta på Delara.
Syskenborna Ingrid og Iver Dalatun er naboar. Til dagleg utvekslar dei berre eit høfleg hei, men dei treffest alltid på Bygdalarm. Då har dei tid til å snakka om andre ting.
Frå venstre: Marthe Knight, Kari Urheim, Anne-Siri Fonneland, Sissel Sandven og Hege Larsen selde billettar.
Malene Wathne hadde pynta seg til festival. Ho fekk foreviga Delara med mobiltelefonen.
Sjølv om det var nokre dropar i lufta tidleg fredag kveld, heldt regnet seg vekke.
Taha Ghanem (t.v.) og Eberaham Esse frå Øvreviken Pizzeria hadde oppgradert menyen for året. Dei baud svoltne festivaldeltakarar på grilltallerken med spareribs, grillklubber, coleslaw, potetsalat og sylta raudlauk.



foto og film bygdalarm kultur og underhaldning norheimsund musikk kultur

Siste nytt

Laga med Labrador CMS