Hardangerbad-garantistar kan verta inhabile

Måndag sende Hardangerbadet AS Kvam herad dei lenge etterspurde underskotsgarantiane. Garantiane på til saman éin million kroner i året skal sikra drifta av bade- og helseanlegget mot underskot dei fyrste ti åra. Den rausaste garantisten er Lingalaks AS, som går god for 200.000 kroner i året. Selskapet skal etter planen etablera eit visingsopplegg for lakseoppdrett i det nye bygget i Øystese sentrum.

Dei andre garantistane, ei blanding av privatpersonar og verksemder, har garantert for mellom 10.000 og 40.000 kroner i året. Dei fleste garantistane har adresse i Øystese, med Kjosås eigedom AS, Kåre Neteland AS og Hardingar AS som unntak.

Fleire politikarar står på lista, noko som vil medføra habilitetsdiskusjonar både i budsjettdebatten og når sjølve Hardangerbadet-saka skal drøftast i november og desember. Ein av dei er Heidi Sandven Botnen (KrF), som har vore ugild i saka lenge ettersom broren er aksjonær. Ein annan er Hallgeir Torpe (H), som ikkje har vore ugild i saka før. I tillegg rommar garantistlista fleire lag og selskap der sysken til politikarar har sentrale roller.

Utanom dei to nemnde politikarane står privatpersonane Roger Vassnes, Frode Børven, Arne Aalvik og Liv Auganæs på lista.

Saman med garantiane sende dagleg leiar Martin Vik i Hardangerbadet mellom anna eit oppdatert driftsbudsjett.