Hardanger kan få eit nytt tilflyttingsprosjekt

Flytt til Hardanger 2.0 kan verta sett i gang.

Hugsar du slagordet «Lukka er sponsa av Hardanger»? Plakatane med slagord under tiltalande menneske ramma inn av fruktbløming, snødekte fjell og blenkjande fjord var eit av resultata av tilflyttingsprosjektet Flytt til Hardanger i perioden 2007—2015.

Dystre folketalsstatistikkar var bakteppet for satsinga, som kosta mange millionar kroner og i stor grad vart fylkeskommunalt finansiert.

Medan prosjektet gjekk føre seg, stoppa nedgangen i folketalet og kom eitt år så vidt over 23.000 etter gamalt. I 2015 budde nær 100 fleire i Hardanger enn i 2007, vel å merka delvis av di Jondal i mellomtida vart utvida med eit par små grender. Dei siste åra har det gått nedover igjen.

Starta debatt

No kan ei oppfylging vera på gang. Bakteppet skal vera at tidlegare statsråd og økonom Victor Norman på Hardangerkonferansen i fjor åtvara mot ei både aldrande og krympande befolkning mellom epletrea. Terje Kollbotn (R) tok opp tråden og lanserte på den same konferansen ideen om eit nytt tilflyttingsprosjekt — eit Flytt til Hardanger 2.0, om du vil.

Meir skulle ikkje til for å setja i gang prosessen. I eit digitalt møte 20. januar stod prosjektet på drøftingslista til regionrådet. Ingen såg ulemper med så smått å setja i gang arbeidet med ei prosjektskisse. Kven som skal betala for gildet, veit ingen enno, men fylkeskommunen vil i fyrste omgang verta invitert til dialog og etter kvart også til å opna lommeboka.

Team Hardanger, eit organ som er organisert under regionrådet og der kommunale næringssjefar og næringsorganisasjonar møtest jamleg for å utveksla siste nytt, vil òg verta teke med på råd, ifylgje dagleg leiar Jostein Eitrheim i Hardangerrådet.

— Me vil snakka med dei som veit kvar skoen trykkjer, sa han.

Dreg vekslar

Eitrheim understreka at prosjektet ikkje naudsynlegvis må heita det same som det gjorde sist. Råds- og Ullensvang-ordførar Roald Aga Haug (Ap) meiner det må vera mogeleg å dra nytte av det prosjektleiar Anette Hjeltnes den gongen samanfatta i fleire sluttrapportar, men utan at ein skal kopiera alt som vart gjort sist.

Ulvik-ordførar Hans Petter Thorbjørnsen (Ap) meiner at det i same slengen kan vera smart å kosta støv av prosjektet Heile Hardanger heile året og sjå om det kan kombinerast med tilflyttingsarbeidet. Han påpeika at sjølv om målet med Flytt til Hardanger i si tid var å lokka folk til få flytta til regionen, var prosjektet kanskje vel så viktig «indremedisinsk» for hardingane.

Kvam-ordførar Torgeir Næss (Ap) meiner erfaringsdeling og samordning av tiltak er nøkkelord. Anders Vatle (Sp), ordførar i Eidfjord, påpeika at sjølv område med mindre trykk i arbeidsmarknaden enn andre kan fungera som bustadregionar.

Haug poengterte at det vil vera viktig å finna matnyttige og resultatorienterte prosjekt som rådsadministrasjonen kan sysla med.

Tevling om folk

Eitrheim var gjest i formannskapsnettmøtet i Ullensvang fredag 21. januar, dagen etter at Hardangerrådet hadde gjeve grønt lys for å setja i gang med ei prosjektskisse. Også der fekk tilflyttingsprosjektet applaus, i ein kommune der store industriverksemder har varsla enorme investeringar.

— Me må få fleire til å flytta hit om me skal lukkast med bemanningsutfordringane og få større næringsliv, sa Erlend Nævdal Bolstad (H).

Vidar Solvi (Ap) påpeika at det ligg inntekter i nye innbyggjarar, og at det er ein viss konkurranse mellom kommunane om dei. Han lura på kva regionrådet vil gjera for å tona ned konkurransen og sikra at regionen som heilskap vert marknadsført.

— Me har hatt på agendaen å framsnakka regionen meir enn å leggja vekt på kvar kommune. Det handlar om å sjå vinsten for regionen, som dryp på kvar kommune, og ikkje fokusera på grensene. Om det kjem eit ungt par med barn, er det ikkje viktig kvar paret bur eller jobbar, sa Eitrheim.

Han trur det kan vera smart å gå oftare ut i pressa for å fortelja om kor flott regionen er og kor gode mogelegheitene er for å bu og arbeida i ulike kommunar.