Det nye bygget, det såkalla velkomstsenteret, kosta kring 28 millionar kroner og stod klart til bruk i 2020. Berre få år seinare vart dei involverte selskapa slegne konkurs. Under synfaringa til bustyraren vart det oppdaga ein vasslekkasje med ukjent omfang, ifylgje meldinga om konkursbuet.
Ingrid Gravdal
– Håpar på drift av skisenter
Etter at det vart opna konkurs då Visitfonna AS melde oppbod 25. november, har det rådd uvisse om framtida til den desidert kraftigaste reiselivsmotoren i Jondal, Fonna Glacier Ski Resort.
23. januar var det skiftesamling i Visitfonna og dotterselskapet Folgefonna Velkomstsenter AS i Hordaland tingrett. Sistnemnde har leigt ut velkomstsenteret frå 2020, med mellom anna restaurant, kiosk, skiutleige og møterom, til morselskapet.
Bustyrar Tonje Tvilde opplyser i dei førebelse meldingane til tingretten og kreditorane at krava i dei to bua til Visitfonna AS og dotterselskapet Folgefonna Velkomstsenter samla lyder på vel 43 millionar kroner. Bustyraren har registrert 61 krav berre i Visitfonna, der krava summerer seg til 29,6 millionar kroner. I Folgefonna Velkomstsenter sitt bu ligg tre krav på totalt 13,6 millionar kroner. Dei to største kreditorane i båe selskap er Innovasjon Noreg og Sparebanken Vest.