– Grundig taksering i Ullensvang
Det har vore mange tolkingar og synspunkt rundt takseringa av næringseigedomar i Ullensvang, fortel rådmann i kommunen, Ole-Jørgen Jondahl.
Den sakkunnige eigedomsskattenemnda har difor valt å gå ut med ei presisering av dei vedtaka som er gjorde tidlegare og den takseringa som har skjedd i kommunen på nyåret 2020.
– Det er ikkje noko dramatisk nytt her, men eg trur at for ein del næringsaktørar er det greitt å få fakta på bordet, seier Jondahl.
Artikkelen held fram under annonsen.
Alle næringseigedomar i Ullensvang kommune er takserte på nytt, basert på eit nytt regelverk frå regjeringa.
Taksatoren gjorde arbeidet frå oktober og utover. Eigedomsskattenemnda meiner det er gjort ein god jobb saman. Kvar eigedom er grundig vurdert som grunnlag for den eigedomsskatten som er skriven ut.
Kraftverka har eit eige skatteregime. Der er det sentralskattekontoret som fastset eigedomsskattegrunnlaget.
Ullensvang kommune har ikkje eigedomsskatt på hytter og bustader.
Bruk og verk går fri
Fellesnemnda fastslo takstreglane for kommunen i april i 2018. Det året kom det ei endring i lovverket som sa at verk og bruk gjekk ut av takseringa.
– Det tyder at me ikkje kan skattleggja produksjonsutstyr, berre eigedomar og bygg, seier Jondahl.
Gamle Ullensvang herad hadde eigedomsskatt på bustader og hytter. Det hadde ikkje Jondal og Odda. Dei hadde berre eigedomsskatt på kraft, verk og bruk.
– Uansett var me nøydde til å gjera ei endring. Fellesnemnda vedtok at det ikkje skulle vera eigedomsskatt på bustader og hytter, seier rådmannen.
Artikkelen held fram under annonsen.
Eigedomsskatt er eit ganske kompleks område. Difor er det ei sakkunnig nemnd som fastset takstane, basert på taksering.
– Det viktigaste å få fram for nemnda er at dette har vore ein grundig prosess, seier Jondahl.
Nokre av dei som har uttala seg i Hardanger Folkeblad i Odda, meiner at takstgrunnlaget og verdifastsetjinga er feil.
– Men det har skjedd ei grundig vurdering av alle næringseigedomane, seier rådmannen.
– Det må næringslivet stola på.
– Får utsett skatt
Korona-pandemien råkar næringslivet sterkt.
– Det har nemnda sjølvsagt full forståing for, men lovverket opnar ikkje for å gje eit generelt fritak frå eigedomsskatt. Denne skatten utgjer 103,5 millionar kroner i inntekter for kommunen. Å gje eit generelt fritak ville fått dramatiske konsekvensar for kommunane, seier Jondahl.
Heradet handsamar individuelt søknader frå næringsaktørar om utsetjing av innbetaling av eigedomsskatten.
Artikkelen held fram under annonsen.
– Me har sagt tydeleg at me skal vera fleksible når det gjeld betalingsutsetjing. Men å seia at skatten skal falla vekk må politikarane ta stilling til, seier rådmannen.
