– Gjekk med 147 millionar i underskot

Det skriv nettavisa iLaks, som har gått gjennom årsrekneskapen til det familieeigde oppdrettsselskapet med hovudkontor i Norheimsund.

Lingalaks omsette for 976,9 millionar kroner i fjor, ein auke på 2,4 prosent frå 2024. Resultatet før skatt enda derimot på minus 147,3 millionar kroner. Året før hadde selskapet eit overskot før skatt på 69,3 millionar kroner.

– Produksjonskostnadene vart litt for høge, seier dagleg leiar Erlend Haugarvoll til iLaks.

Styret skriv i årsrapporten at Lingalaks gjekk inn i året med høg biomasse og god produksjon, noko som gav høge slaktevolum og slaktevekter i fyrste halvår. Prisane vart likevel svakare enn venta frå slutten av fyrste kvartal og resten av året.

Samstundes har kostnadene auka dei siste åra, mellom anna som fylgje av høgare prisar på fôr. Styret omtalar resultatet som ikkje tilfredsstillande, og opplyser at kostnadsreduserande tiltak held fram med fullt trykk i 2026.

Ved årsskiftet hadde Lingalaks ein eigenkapital på 314,3 millionar kroner og ei gjeld på 1,17 milliardar kroner. Eigenkapitaldelen var 21,2 prosent, og selskapet var dermed under bankkravet på 25 prosent. Banken har mellombels redusert kravet til 20 prosent ut 2026, skriv iLaks.

I mars selde Lingalaks eigardelane sine i Sævareid Fiskeoppdrett. Ifylgje iLaks har salet styrkt både eigenkapitalen og likviditeten i selskapet. Lingalaks hadde 70,6 årsverk i 2025 og er heileigd av Haugarvoll-familien.