Fylte tre bilar med boss

Forsøplinga var så omfattande at Bir igjen drog til staden for å henta boss i helga.

Kommunikasjonsrådgivar Tina Skudal fortel at åtte personar, inkludert to klatrarar, køyrde frå Bergen i 8-tida om morgonen, og var tilbake rundt 20.30. Dei fylte tre store bilar med søppel. Mellom anna fann dei eit kjøleskap og restar av eit militærkøyretøy.

- Når me først køyrer så langt, må me ta oss tid, seier Skudal.

- Då me var der sist, stod me i ein svær haug i timesvis. Det var så mykje at me tenkte me ikkje gjorde ein skilnad. Men då me kom inn att i helga, såg me at me hadde gjort ein stor skilnad, fortel ho.

I november fann Bir ei vaskemaskin som stod langs vegen. Då tenkte Skudal at staden framleis vart brukt til bosstømming. I helga såg ho medvite etter nye ting. Ho seier at det meste av bosset var gammalt, frå før det var etablert attvinningsstasjonar i kommunen; mellom anna dekk frå 50-talet.

Av nyare ting var det ein terrassestol og ein kupévarmar frå Biltema. Det var dessutan ein enorm haug med hageavfall.

Jobben er ikkje over på staden. Skudal seier at Bir vil ha ein ny dugnad, truleg til hausten.

Ho har registrert på Facebook at fleire Ålvikarar har vore interesserte i å stlla til dugnad. Dei må gjerne komma.

- Eg har tenkt å ta dei på ordet. Særleg etterlyser me ein arbeidsvillig og kjekk ålvikar med ein stor traktor med lang wire og sterk vinsj, som har lyst til å ha det fint rundt seg, seier ho.

Bir har bede kommunen om å få setta opp eit skilt på staden, til dømes eit som informerer om opningstider på attvinningsstasjonane. Skudal har fått positivt svar frå ordføraren.