Eit vogntog glei på snøføret og hamna på tvers av fylkesveg 49 i svingane ved Nybø, opp mot Tokagjelet, sundag kveld. Vegen vart difor stengd. Ingen vart skadd.
Statens vegvesen melde om vegstenginga, og HF fekk fleire meldingar om hendinga frå privatpersonar. Meldinga om henne kom klokka 22.54.
Annonse
Ifylgje den gjeldande vegmeldinga klokka 23.24 kunne vegen verta stengd heilt til klokka 02. Fasiten var at meldinga om at vegen var opna heilt for fri ferdsle, kom klokka 03.46.
Operasjonsleiar Tore A. Brakstad i Vest politidistrikt opplyser til HF at tungbilbergar vart tinga, men at bilen var nokre timars køyring frå staden. Han var klokka 00.30 venta å kunna vera framme og koma i sving kring klokka 01.30.
Politiet rykte etter kvart ut for å hjelpa til og sjå om det var mogeleg å få personbilar forbi det stranda vogntoget. Det skulle mogelegvis gå an ved å ta grøfta i bruk, ifylgje meldingane.
