Fosse er klar med ny bok

Tittelen er «Vaim», og er den første av tre som blir knytte til den oppdikta staden Vaim. Romanen blir skildra som «ei forteljing om Eline, Jatgeir og Frank, snekker og sjarkar, kjærleik og død, føyelege menn og ei uvanleg viljesterk dame».

Lanseringsdagen 5. september er også opningsdagen for Den internasjonale Fossefestivalen, som Fosses forlag Samlaget arrangerer saman med Det Norske Teatret.

Andre titlar som kjem ut på Samlaget denne hausten, er mellom anna Maria Parrs nye bok i serien om Oskar og Ida, kalla «Oskar og eg. Alle tinga vi har», som kjem 8. august.

Forlaget lanserer også ein ny serie med historisk krim av Martin Baldysz, der første boka heiter «Stille grender». Den skildrar søskenparet Ryer som løyser krimgåter på Sunnmøre. Klassekampen-journalist Frida Fliflet debuterer med novellesamlinga «Kan eg sjå på?».

Når det gjeld sakprosa, blir det mellom anna erindringsbok frå «Der ingen skulle tru»-skaparen, kalla «Vegen som vart min: Oddgeir Bruaset ser seg tilbake» og «Lothepus-manualen: dette fiksar du», som ifølgje omtalen er råd som er enkle å følgje.