Foss får kiosk

— Eg har ofte lura på kvifor ikkje samningane lagar til noko ved Fossen Bratte. I Kvam har dei Steinsdalsfossen, der det er sal av mat og suvenirar. Men me har jo ein foss med særpreg og historie på denne sida av fjellet òg.

Det seier Sigmund Dyrhovden til Samningen. Avisa skriv at han nyleg fekk fylkeskommunalt løyve til å setja opp ein kiosk ved fossen. Med seg på laget har han Nahid Ameri frå Åsane, som påpeikar overfor avisa at fossen rommar historier om både krig og kjærleik.

Planen er å starta kiosken i mai, men koronatiltaka gjer det heile litt usikkert.

Det fylkeskommunale løyvet er av det mellombelse slaget, og gjeld frå mai til september. Også kommunen er positivt innstilt, skriv Samningen.