– Forferdeleg trist

Tysdag kveld tok det fyr i ei trehytte ved ein barnehage i Øystese, melde Vest politidistrikt i Politiloggen. 

Barnehagestyrar i Bjørketeigen barnehage, Ann-Kristin Strømme Bråten, fortel at ho sov heile natta. Då ho vakna onsdag morgon, såg ho at ho hadde fått fleire oppringingar på arbeidstelefonen i løpet av natta.

Då ho høyrde meldinga om brannen på radioen onsdag morgon, forstod ho at barnehagen hennar var råka.

Brannen vart varsla klokka 23.41. 

Bygd av foreldre

Bråten fortel at borna nyttar hytta nesten dagleg. Bygningen står i skogen rett over barnehagen. Ho var på plass for å sjå kva som var att etter brannen onsdag morgon.

– Det er forferdeleg trist. Det er trist for barnehagen, borna og foreldra som har stått på og bidrege til at me fekk hytta, seier ho.

Foreldre bygde hytta på dugnad i 2021–2022. Cato Haaheim Kjosås var hovudmannen i prosjektet. Han fortalde HF i 2022 at grindverksbygget vart reist heime i løa med god hjelp frå svigerfar Harald Kjosås. Etter at tomta var graven ut ved barnehagen, vart bygget plukka frå kvarandre, frakta til barnehagen og reist der med hjelp frå foreldre.

Hytta hadde veggar og vindauge, og eit langbord med benkar inni. Det var ei dør for dei vaksne, og ei lita dør til borna. Dørene hadde ikkje lås.

– Det er kjempeflaks at brannen ikkje har spreidd seg. Det er ikkje så veldig langt ned til barnehagen, og hytta ligg midt i skogen. Det har lenge vore oransje farevarsel for gras og skogbrann i Vestland, seier Bråten.

Fleire hendingar før

Brannsjef Torleif Ones fortel at brannen var udramatisk for brannvesenet. Meldinga kom 23.28. Fire minutt seinare var den fyrste bilen på veg ut frå brannstasjonen. Brannvesenet var på staden klokka 23.42. Då stod hytta i full fyr. Vaktlaget var i gang med sløkkjearbeidet klokka 23.58. Brannen vart sløkt ein halvtime seinare.

– Det var ikkje spesielt stor spreiingsfare til terrenget eller hus. Det er fuktig og grønt ute, og er ikkje så tørt i terrenget, seier Ones.

Barnehagestyraren fortel at det i desember var tre tilfelle der tilsette fann spor etter at nokon hadde tent bål og smelta plastleiker i gapahukar barnehagen har i skogen. Ved dei tre tidlegare tilfella var det i andre bygg. Ho veit ikkje kven som har tent bål tidlegare, men det siste tilfellet vart meldt til politiet.

– Eg håpa faren var over. Ingen har lov til å laga bål etter 15. april, seier Bråten.

Sperra av

Ho fortel at barnehagen ikkje fyrer opp bål i perioden med forbod, altså mellom 15. april og 15. september. Om barnehagen skal gjera eit unntak, spør Bråten brannvesenet om løyve fyrst.

Då HF var på staden onsdag morgon, var området sperra av. To tilsette i Kvam herad hadde sett opp ekstra gjerde innanfor sperringane for at borna ikkje skal kunna koma fram til brannstaden.

Bråten fortel at politiet skal granska saka, men at det er uklart kva som skjer etterpå. Uansett må restane vekk. Om bygget var forsikra, veit ikkje barnehagestyraren.

– Hytta var bygd av foreldre, så eg er redd det uansett ikkje vil bli akkurat likt. Me må få oversikt, og så må me vurdera kva me skal gjera, seier Bråten.

Brannårsaka er ukjend. Politiet har oppretta sak, ifylgje Politiloggen.