Fleire hobbyelektrikarar kan føra til brann
Folk bør tenka seg om to gonger før dei prøver seg på å reparera elektronikk på eiga hand, oppmodar forsikringsselskap.
Feil i elektriske anlegg er blant dei vanlegaste årsakene til brann i bustader, skriv Fremtind forsikring i ei pressemelding. Kvart år får dei saker forårsaka av ufaglærte hobbyelektrikarar.
– Noko kan du gjera sjølv, men det er klare reglar for kva du skal overlata til fagfolk. Feilmontering av elektrisk arbeid aukar brannrisikoen betrakteleg, seier skadeførebyggar i Fremtind, Therese Hofstad-Nielsen.
Artikkelen held fram under annonsen.
Dei siste tre åra har kring 3000 brannskadar med opphav i elektriske artiklar og anlegg blitt registrerte hjå Fremtind. Den samla erstatninga er på 62 millionar kroner.
– Nokon tenker at dei kan spara pengar på å legga varmekablane sjølve, men det kan få store konsekvensar. Om arbeidet ikkje er utført riktig, risikerer du å få varmgang, som i verste fal fører til brann. Det er heller ikkje sikkert at du får dekt skadane når installasjonen ikkje er utført forskriftsmessig, seier ho.
(©NPK)
