Fastrentene i Lånekassen aukar

Fastrentene på studielån i Lånekassen aukar frå 1. september, slik at dei vil liggje på rundt fire prosent.

– Det at fastrentene våre går ytterlegare opp, heng saman med at marknadsrentene har gått opp. Renta i Lånekassen har likevel eit etterslep, og det forklarer kvifor fastrentene på studielånet ikkje har auka like mykje som i marknaden elles den siste tida, seier kommunikasjonsdirektør Anette Bjerke i Lånekassen i ei pressemelding.

Fastrentene vil frå 1. september vere 3,88 prosent for tre års binding, opp frå 3,435 prosent. Fem års binding blir sett opp frå 3,581 prosent til 3,986. Renta for ti års binding går no opp frå 3,687 prosent til 4,054.

Den flytande renta vil samtidig liggje på 1,972 prosent.

I januar i fjor var til dømes fastrenta med tre års bindingstid så låg som 1,48 prosent. Totalt 1.500 kundar valde å binde renta for ulike periodar på dette tidspunktet.

– Som regel er det behovet for føreseielege utgifter som er motivet for å binde renta, men slik situasjonen er no, kan det også ha lønt seg, seier Bjerke.

– Erfaringsvis er det få kundar som bind renta. I fjor var det samla sett 3.800 kundar som batt studielånsrenta. Hittil i år er det 900 som har bunde renta.

(©NPK)