Få går gjerandslause i Jondal

Jondal, Modalen og Eidfjord – alle kommunar med få innbyggjarar – er dei tre kommunane med lågast arbeidsløyse i Hordaland. I Jondal var 1,1 prosent av den såkalla arbeidsstyrken ledig i mai. Det tilsvarar 6 personar, eller 2 færre enn i fjor, ein nedgang på heile 25 prosent.

I Kvam auka arbeidsløysa med 7 personar til 94, som utgjer 2,2 prosent av styrken, frå mai i fjor til mai i år.

I heile fylket var arbeidsløysa på 2,9 prosent. Nedgangen frå i fjor er på 802 personar, til 8.188.

– Den positive utviklinga i arbeidsmarknaden var ikkje berre eit blaff, seier assisterande fylkesdirektør Tommy Johansen i ei pressemelding frå Nav Hordaland.

Industriarbeid, bygg og anlegg og ingeniør og IKT-fag er yrkesgruppene med flest arbeidsledige, men samstundes dei gruppene der flest har fått seg arbeid dei siste månadene.