«Elsa» fører til ekstremflod

Meteorologisk institutt varslar om ekstrem høg vasstand på Vestlandet måndag ettermiddag til tysdag ettermiddag.

I Norheimsund er sjøen venta å stiga til 229 centimeter over sjøkartnull natt til tysdag, og 200 centimeter ved middag onsdag. På det meste er det 85 centimeter høgare enn det spådde tidevatnet.

Til samanlikning melde Meteorologisk institutt om vasstand på 204 centimeter over sjøkartnull ved førre stormflod 15. januar, medan lokale målarar målte opp mot 219 centimeter.

Det er ekstremvêret «Elsa» som, i kombinasjon med høgt astronomisk tidevatn, fører til den høge vasstanden.

Kvam herad oppmodar på heimesida si om å unngå ferdsle i strandsona, vurdera å ta båtar på land og å sikra lause gjenstandar i naust og strandsona.