Arne-Kristian Teigland fortalde om mange tunge treningsturar, men det tyngste med førebuingane var då han skulle få stell av ein blå nagl hjå Paloma i Øystese. – Då var det hardt å vera ein 43 år gamal mann, men behandlinga var deileg, og eg kjem til å gjera det igjen, sa AK.
Sindre Helgheim
– Eg gjekk til eg stupte
160 løyste billett i Holmatun laurdag kveld for å høyra AK fortelja om verdsrekordforsøket. Dei fekk fyrst og fremst høyra om førebuingane til turen og korleis livet på isen i Antarktis var, men også om vonde føter, «fuelangst» og ein mann som var nær døden.
Målet til AK var å verta verdas raskaste polfarar frå Hercules Inlet til Sørpolen. Ruta er 1.130 kilometer lang. For å slå rekorden måtte han gå raskare enn Vincent Colliard, som gjekk ruta på 22 dagar, 6 timar og 8 minutt i januar i fjor.
– De anar ikkje kor mykje eg har tenkt på 22 dagar, 6 timar og 8 minutt, sa AK.