Dette er matvarene som har stige mest i pris i 2025
Sitrusfrukter har hatt den største prisauken på matvarer i år med 23 prosent. Også kakao og kaffi har vorte mykje dyrare, og det er det spesielt éin grunn til.
Det viser tal Nationen har henta frå Statistisk sentralbyrå (SSB). Sjølv om den generelle prisveksten på matvarer har vore på 4,2 prosent, har enkelte varegrupper hatt sjokkaukar på over 20 prosent.
– Det vi ser, er i stor grad eit globalt fenomen prega av sviktande avlingar og klimaendringar, seier seksjonssjef Espen Kristiansen i SSB til Nationen.
Annonse
Kristiansen peikar spesielt på Brasil, den største produsenten i verda av både kaffi og appelsinar.
– Appelsinavlingane i Brasil har vore dårlege. Det same gjeld kaffi. For kakao er det utfordringar i Vest-Afrika som driv prisane opp.
Kakao og kaffi har hatt prisaukar på høvesvis 23 og 15 prosent. Eple har vorte 22 prosent dyrare.
Dagleg leiar Christian Anton Smedshaug i Agri Analyse stadfestar biletet av eit krevjande år for frukt og grønt.
Annonse
– Det var ein del frost i Aust-Europa i vår som reduserte avlingane på eple, plommer og aprikosar. Dette er vêrstyrt, og sidan produksjonen av frukt og grønt er arbeidskrevjande og arbeidskrafta har vorte dyrare, slår det hardt ut.
Smedshaug spår ein prisvekst på noko over tre prosent for 2026, noko lågare enn i 2025.
– Vi kan sjå for oss betre avlingar på kaffi, og i andre halvdel av året kan vi faktisk sjå fallande prisar i butikk. Det er rom for lågare prisvekst, seier han.
(©NTB)
