Det kan koma bomstasjon mellom Øystese og Norheimsund

Bomstasjon mellom Norheimsund og Øystese og minstetakst på 25 kroner kan verta resultatet om kvemmingane vil utvida Kvammapakken.

Dersom dei vil inkludera anten pengar til ny vegløysing i Tokagjelet (sjå hovudsaka) eller håfjellstunnelen, må pakken utvidast monaleg ettersom han er så godt som pengelens alt no.

Føresetnadene

Skal eit av dei store prosjekta inn i pakken, vert dette dei trulege konsekvensane:

• Ein ny bomstasjon mellom Norheimsund og Øystese.

• Ein ny bomstasjon på fylkesveg 49.

• Trafikantane må betala i båe køyreretningar sjølv om dei passerer innan ein time.

• Ein minstetakst etter rabatt på om lag 25 kroner.

• Utviding av bompengeperioden med fem–seks år om lag til 2035.

Utviding av bompengeperioden med seks år må til også dersom kvemmingane berre vil hanka inn pengar til å fullføra den vedtekne Kvammapakken.

Om ting går glatt, kan den reviderte Kvammapakken oppstå 1. januar 2018.

Tunnel: anten eller

Ifølgje Hopen kan ikkje Kvam rekna med meir enn om lag ti prosent fylkeskommunal delfinansiering av netto kostnader.

Ifølgje Hopen kan kvemmingane gløyma å få i pose og sekk i form av både håfjellstunnel og hardangertunnel eller ei anna vegløysing i Tokagjelet. Finansieringsgrunnlaget – med andre ord trafikken – er for dårleg.

Hopen meiner kvemmingane bør starta ein grundig debatt om saka i haust, og frårår sterkt å rota seg inn i detaljdiskusjonar om til dømes plasseringa av bomstasjonane. Etter hans syn bør dei fyrst velja om dei vil utvida pakken og eventuelt kor mykje, for så å prioritera kva mindre prosjekt dei vil fullføra. Til sist kan dei få lov til å kasta seg over dei nemnde detaljane.

Investeringsstopp

Det billegaste og enklaste alternativet til kvemmingane er å setja foten ned og droppa dei prosjekta i Kvammapakken som ikkje er bygde: Steinstøberget, bostippen, Stronda–Skarpasvingen og Kvamskogen. Det manglar om lag 280 millionar kroner til prosjekta, føresett at vegtiltaka på Kvamskogen er kostnadsrekna til 38 millionar kroner.

Om det siste alternativet vert valt, vil bomstasjonane stå til 2030.

Stor nytte, små utgifter

Hopen er ikkje i mål med utgreiinga, som han utfører på vegner av fylkeskommunen. Han presenterte det førebelse arbeidet for formannskapet tysdag.

Han påpeika mellom anna at dei fleste utførte vegprosjekta i Kvammapakken ligg på strekkja Vikøy–Øystese, og at dei lokale trafikantane i dette området ikkje betalar bompengar sjølv om dei har mest nytte av vegtiltaka.