Byggjer fleire dagsturhytter
Samarbeidspartia i Vestland fylkeskommune set av to millionar kroner til bygging av fleire dagsturhytter i regionen. Det tyder ei styrking av friluftslivspolitikken.
– Dette er ein god dag for friluftslivet i Vestland, seier fylkestingsrepresentant Alexander Fosse Andersen (Sp) i ei pressemelding.
Fylkestinget i Hordaland vedtok alt i juni 2019 å løyva to millionar kroner til eit dagsturhytteprosjekt i Hordaland. Det held til ti slike hytter.
– Ved å løyva ytterlegare to millionar til dagsturhytteprosjektet, vil det vera mogleg å byggja fleire dagsturhytter i Vestland. Satsinga på dagsturhytter er eit resultat av ynsket om å få fleire i fysisk aktivitet, seier Andersen.
Dagsturhytteprosjektet vart utvikla i Sogn og Fjordane som eit lågterskeltilbod for å få fleire turgåarar. Den fyrste dagsturhytta vart opna i Gloppen i desember 2018, og dei fleste kommunane i Sogn og Fjordane har ei dagsturhytte.
Dagsturhyttene har raskt vorte populære turmål. Hyttene inneheld òg eit nynorsk turbibliotek med barnelitteratur.
30. august 2019 vedtok fylkesutvalet i Hordaland ein finansieringsplan for dagsturhytteprosjektet i Hordaland, organisering og framdriftsplan.
Kommunane vel sjølve om dei vil ta mot ei dagsturhytte og må sjølv bidra med 367.000 kroner, men ein kan få momskompensasjon.
– Friluftsliv bidreg til betre folkehelse. Dagsturhyttene er gode turmål og møteplassar som får fleire i alle aldrar ut på tur. For Sp og samarbeidspartia er etablering av dagsturhytter i heile Vestland eit viktig tiltak for ein aktiv friluftslivspolitikk i det nye fylket, seier Andersen.