BT: Politiet kom til dødsulukke etter 80 minutt

Ein mann døydde i ei trafikkulukke i Tysnes søndag. Ulukkesstaden er del av Kvam, Samnanger og Tysnes politidistrikt. Patruljen som rykte ut måtte køyra frå Norheimsund. Ulukka skjedde klokka 15.47. Patruljen var framme klokka 17.07.

– Det er ikkje bra i det heile teke. Det er mykje arbeid som skal gjerast ved alvorlege trafikkulukker, seier politistasjonssjef i Kvam, Terje Sperrevik, til Bergens Tidende (BT).

Politistasjonssjefen ber om orsaking for tidsbruken. Han seier til BT at manglande ressursar har skulda.

Politiet skal vera framme innan 30 minutt i 80 prosent av hasteoppdraga i kommunar med under 2000 innbyggjarar. Til ulukka søndag brukte politiet 50 minutt meir enn kravet. I kommunar med mellom 2000 og 20 000 innbyggjarar er tida sett til 19 minutt i 80 prosent av hasteoppdraga.

Ein lege som tilfeldigvis kom forbi ulukkestaden, sette i gang med livreddande tiltak, men mannen vart erklært død klokka 15.54. Ambulanse var raskt på staden, ifylgje BT.

Sperrevik seier til avisa at ressursane har vorte knappare, spesielt dei siste to åra. Han meiner at heile Vest politidistrikt har for få patruljar.