Brann i hytte på Kvamskogen

Det oppstod laurdag kveld brann i ei Raudekrossen-hytte i Furedalsskaret på Kvamskogen. Naudetatane fekk melding om brannen klokka 19.30.

I hytta var 18 skuleelevar frå ein skule i Bergen, pluss fire vaksne. Alle kom seg ut av hytta. Det vart kring klokka 20 sett i verk sløkking i regi av brannvesenet, som rykte ut frå både Kvam og Samnanger. Også politiet hadde då kome til staden. I tillegg rykte ambulansetenesta ut.

Innsatsleiar Per Gunnar Thrane i Kvam, Samnanger og Tysnes politistasjonsdistrikt opplyser at det byrja brenna på utsida av ein vegg, og at brannen spreidde seg under bordkledninga. 

Dei vaksne i hytta sløkte etter beste evne med hageslange, men kom ikkje skikkeleg til og lukkast berre med å halda brannen i sjakk. Brannvesenet tok seg av resten av jobben, og måtte fjerna litt av kledninga for å lukkast.

Fem personar fekk oksygenbehandling som fylgje av at dei vart eksponerte for røyk, fortel Thrane. Han seier at mange i brannmannskapet vart tilkalla mellom anna med tanke på spreiingsrisikoen, sjølv om det ikkje var sterk vind i området i kveld.

Etter brannen vart turgruppa samla i kafeen til Furedalen Alpin, og foreldre vart tilkalla for å henta heim elevane. Det er ikkje snakk om å overnatta i hytta i natt, fortel Thrane.

Han seier at utrykking gjekk greitt. Ein grunneigar sytte for å opna bommen på vegen for naudetatane.

Hytta tilhøyrer Arna og Åsane Røde Kors.