Fjellet på Vestlandet fekk snøfall allereie i september. No blir det varsla lågare temperaturar og snø fleire stader både i nord og andre stader i fjellet. Foto: Statens vegvesen / webkamera

Bilkøyrarar må førebu seg på snø og glatt føre fleire stader

Sør-Noreg beheld penvêret kanskje heilt ut i neste veke. Men i fleire delar av landet må bilførarane førebu seg på moglege varsel om snø og glatt føre.

– Vi kan komme med varsel for å gjere folk merksam på at det kan komme snø på stader der ein ikkje har fått så mykje snø enno i år, seier statsmeteorolog Marit Berger i Meteorologisk institutt.

Det gjeld for Nord-Noreg dei næraste dagane, men det kan òg bli kaldt enkelte stader lengre sør i helga, viss prognosane held seg. Då kan det bli snø.

Vinterleg i nord

Nord-Noreg får i helga lågtrykk, meir vind og nedbør.

– Det blir kjøligare i Nord-Noreg no. Gjennom helga og kanskje neste veke blir det meir vinterlege forhold, seier meteorologen. Ho legg til at det er vanskeleg å seie nøyaktig kor lågt snøgrensa vil gå.

– Men det er greitt å ha skifta til vinterdekk, minner ho om til dei som framleis ikkje har gjort det.

Lågtrykket blir liggjande utanfor Lofoten. Det trekkjer med seg nedbør, vind og kjølig luft. Det blir lågare temperaturar og kjøligare ut over helga på vestsida av landet. Det gjeld både for nordover frå Stad, men også eit stykke sørover.

Høgtrykk i sør

Trøndelag får til veka pålandsvind med meir skyer og moglegheiter for regnbyer, særleg i ytre strøk. Dei får ikkje glede av høgtrykket som dekkjer delar av Sør-Noreg.

– Men det blir ikkje fullt så låge temperaturar som i Nord-Noreg. Dei ligg godt på plussida. Nattfrost blir ikkje noko problem. Det er venta skyer òg om natta og mellom 6 og 7 grader, seier Berger.

Mange delar av Sør-Noreg har hatt eit veldig fint vêr i fleire dagar. Dette vil halde fram ei stund vidare, men det svekkjer seg ved helga og innover neste veke.

– Det ligg eit høgtrykk ute i Atlanterhavet, vest for landet. Det kan bli eit skifte etter helga. Nedbør vil først komme på Sørlandet, medan på Austlandet heng det litt igjen og her vil godvêret vare lengst, seier meteorologen.

Artikkelen held fram under annonsen.

(©NPK)