Ber om gangfelt
Det burde koma eit oppmåla gangfelt over Vikevegen ved porten til Jondal barnehage.
Det skriv styrar Kristin Opedal i eit innspel til trafikktryggleiksplanen for Ullensvang.
Eit slikt gangfelt vil vera tenleg for skuleelevar som fylgjer fortauet langs barnehagen frå sentrum og kryssar vegen der for å gå over til skulen.
Artikkelen held fram under annonsen.
Vikevegen har gjennomgangstrafikk frå bustadfelt over skuleområdet, og mange foreldre leverer borna til barnehagen ved å køyra inn og parkera på parkeringsplassen ved barnehagen, skriv Opedal.
Vidare ynskjer barnehagen at det vert laga fleire gangfelt over fylkesveg 550 gjennom Jondal sentrum. No er det ikkje eit einaste gangfelt. Det er 30-sone, men mange køyrer svært fort.
– Fartshumpane burde kanskje vore høgare for å tvinga farten ned? skriv Opedal.
Det er stor trafikk, spesielt når det nærmar seg ferjeavgang.
Ved inngangen til brua over Jondalselva er det eit svært lågt gjerde i båe endar. Gjerdet burde vore sikra og gjort høgare og tryggare, påpeikar Opedal.
