Barnehagelærar dømd etter fallulukke
Eit barn fall ut av eit vindauga under ein tur med barnehagen i fjor. Barnehagelæraren som opna vindauga, er dømd til fengsel på vilkår i 25 dagar.
Publisert
Sist oppdatert
I tillegg må kvinna betala oppreisingserstatning til barnet på 160 000 kroner.
Det går fram av domen frå Hardanger og Voss tingrett, som var klar torsdag 9. april.
Annonse
Uhellet fann stad då ein barnehage var på tur i Kvam i mai i fjor. Det var varmt på rommet, og barnehagelæraren opna barnesikringa og sette vindauga på vidt gap. Om morgonen gjekk kvinna ut av rommet utan å lukka vindauga att. Eit barn fall ut av vindauga og fekk alvorlege skadar.
– Handla aktlaust
I retten fortalde kvinna at ho aldri skulle ha opna vindauga. Fleire kollegaer og tilsette i barnehagen forklarte at dei aldri ville ha opna barnesikringa. Ein av dei tilsette kalla handlinga tankelaus.
Tingretten meiner at kvinna handla aktlaust då ho braut barnesikringa og opna vindauga, og sidan forlét rommet utan å sikra borna tilsyn. Retten legg vekt på at det var 4,27 meter frå karmen til bakken, berre 47 centimeter frå ei seng bort til veggen med vindauga, og berre 97 centimeter frå golvet opp til vindauga. Retten legg vekt på at kvinna var tildelt eit spesifikt ansvar for tryggleiken til dei tre borna som var på rommet. At kollegaer handterte utfordringa med varme utan å bryta sikringa, vert trekt fram i domen.
Annonse
– I denne rolla og situasjonen er det å forventa at tiltala vurderer kva risiko eit ope vindauga utgjer, heiter det.
– Må få fylgjer
Retten framhevar at kvinna, som ikkje erkjende straffskuld i retten, letta etterforskinga av saka monaleg ved å tilstå dei faktiske tilhøva. Ho har sagt at ho er svært lei seg for fylgjene og har bede om orsaking.
– Det er likevel viktig at ei så tankelaus handling med så store fylgjer får strafferettslege konsekvensar. Det vil skjerpa fokuset på tryggleik for born i både barnehage og skule, og kunna bidra til at slike hendingar ikkje skjer igjen, heiter det i domen.
Aktor Marcus Østgård Monsen meinte at kvinna måtte straffast med fengsel på vilkår i 36 dagar for manglande refleksjonar over risikoen ho utsette barnehagebarna for. Det sentrale spørsmålet i saka var om kvinna handla berre tankelaust eller også aktlaust.
Forsvarsadvokat Torbjørn Kolås Sognefest la i retten ned påstand om å frifinna barnehagelæraren.
