Badeentusiastar på pinebenken

Hardangerbadet AS må venta til desember på avgjerda om bygging av anlegget. Utfyllinga i sjøen kan verta godkjend allereie måndag.

– Skrivefristen er ute for den møtebolken. Det manglar framleis noko i leveringa frå Hardangerbadet. Sidan saka vil ha verknad for budsjettet til Kvam herad utover det som ligg i økonomiplanen, er det føremålstenleg å ta saka i desember i samband med budsjettet. Då vil kommunen vita meir om verknaden av statsbudsjettet, fortel ordførar Jostein Ljones (Sp).

Ynsket til Hardangerbadet AS var fyrst vedtak i oktober, så vedtak i heradsstyremøtet 7. november. No har altså det andre toget gått.

Har ikkje levert enno

Hardangerbadet AS har levert driftsbudsjett, men framleis vantar forpliktande dokument om leigetakarar og underskotsgarantiar. Dokumenta er viktige av di rådmannen må forsikra seg om at inntektene er store nok til at det kommunale føretaket får husleiga det skal ha frå den private delen av anlegget.

Rådmannen har ein omfattande jobb å gjera i saka. Skrivefristen til inneverande møtebolk gjekk ut 13. oktober. Rådmannen må mellom anna kontrollera om bygginga påfører heradet nye netto driftskostnader. Heradsstyret sette i 2015 som vilkår for å delta i prosjektet at heradet slepp like billeg unna driftsmessig som før.

LAB entreprenør AS har gjeve eit tilbod som inneber eit pristak på 166 millionar kroner. Ifølgje ordføraren gjeld tilbodet så lenge det vert vedtak om bygging i november eller desember.

Ja til utfylling

Måndag drøftar planutvalet søknaden om dispensasjon frå reguleringsplanen for utfylling i sjøen framfor det planlagde bade- og helseanlegget. Målet er mellom anna å få på plass eit park- og badeområde. Tanken er å nytta steinmassar frå vegutvidinga ved Laupsa.

Rådmannen tilrår å gje dispensasjon frå reguleringsplanen, på mellom anna følgjande vilkår for å sikra at intensjonen med reguleringsplanen for området vert følgde opp:

• Det vert gjennomført ei reguleringsendring knytt til fyllinga.

• Gangvegen framfor anlegget skal vera bygd før Hardangerbadet får bruksløyve.

• Straumforhold og sedimentavsetning må granskast.

– Eit positivt sentrumstiltak for ålmenta, Hardangerbadet og Hardangerfjord hotell. Tiltaket vil erstatta arealet som går med til bygget til Hardangerbadet og gjera området meir tilgjengeleg, skriv rådmannen.

Tilrår regulering

Steinfyllinga skal vera om lag 170 meter lang og 25 meter brei, og skal romma nesten 20.000 kubikkmeter. Det har ikkje komme nabomerknader til tiltaket. Fylkesmannen meiner ei reguleringsendring vil vera betre enn dispensasjon, og meiner heradet må leggja stor vekt på strandsonevernet.

Fråsegna frå Fylkesmannen kom måndag, etter eit møte med Kvam herad fredag. Saksutgreiinga vart send ut onsdag, fem dagar før avgjerda skal takast.